Ana Pontón defendeu modificar a lei de animais domésticos e salvaxes en catividade co fin de declarar Galiza territorio libre de touradas
A deputada defendeu que Galiza se sume a Cataluña ou Canarias e outras partes do mundo que avogaron por suprimir as touradas pero o PP negase a modificar a lei neste sentido.
Pontón, explicou que a Proposición de lei nacionalista trata de modificar o artigo 5 dos espectáculos que prohibe a utilización de animais en espectáculos, pelexas, festas populares e outras actividades se iso lles pode ocasionar danos, sufrimentos ou facelos obxecto de tratamento antinatural, sen embargo, no apartado seguinte do artigo quedan excluídos do ámbito da aplicación desta lei a festa dos touros, encerros e demais espectáculos taurinos.
Para a parlamentaria, a lei establece un principio xeral que ela mesma incumpre e hoxe, vinte anos despois, temos a oportunidade de corrixir esta situación e lexislar a prol dunha sociedade que respecte os dereitos dos animais.
A Proposición de lei que hoxe defendemos, engadiu, é unha proposta en positivo baseada en tres elementos fundamentais: A defensa dos dereitos dos animais, a inexistencia desta tradición en Galiza, e por seren actos crueis e unha auténtica barbaridade, son tortura e non cultura, recalcou.
Axudas públicas á crueldade animal
A deputada denunciou as axudas públicas ao sector da tauromaquia que sobrevive sobre todo grazas aos subsidios públicos 700 millóns de euros en axudas mentres o PP non lle treme o pulso con recortes no básico, na cultura, na educación e na sanidade.
Pontón lembrou que na pasada lexislatura o Parlamento galego recoñeceu a crueldade desta práctica aprobando por unanimidade que se prohibira o acceso de menores a espectáculos taurinos polo seu impacto negativo e porque insensibiliza sobre a violencia.
Os touros sofren coas puías, estoques e descabelos
A deputada criticou que os defensores das touradas xustifiquen a súa existencia argumentando que o touro non sufre, estas afirmación, dixo, son falsas porque os animais son sometidos á tortura con puías, puntillas, descabelos e estoques.
No BNG, dixo, temos claro que isto non é cultura, é tortura, e pensamos que hai razóns de peso para adoptar unha decisión que será ben acollida na Galiza e que responde a un sentir maioritario que nos situará na vangarda dos países que respectan os dereitos dos animais.
A parlamentaria agradeceu o traballo e apoio de diversos grupos á iniciativa do BNG entre os que nomeou: a Plataforma Galiza mellor sen touradas, Sarria libre de touradas, Plataforma Prou, Fundación Franz Weber, Plataforma Tortura Non é cultura e Cas Internacional, cuxo presidente visitou o Parlamento recentemente e remitiu unha carta a tod@s @s deputados, solicitando o apoio para a iniciativa nacionalista.
Pontón lamentou o voto negativo do Partido popular e recriminou que algúns deputad@s conservadores mantiveran unha postura hipócrita votando en contra da proposta nacionalista despois de ter manifestado estaren en contra dos festexos taurinos.
