O deputado do BNG no Congreso, Néstor Rego, denuncia un novo incumprimento do Goberno do Estado ao negarse a derrogar de maneira íntegra a Lei de Seguranza Cidadá, tamén coñecida socialmente como Lei Mordaza, e aspirar única e exclusivamente a “intentar reformala con aspectos cosméticos” sen eliminar os aspectos centrais. A frente nacionalista sinala como culpábeis da non derrogación da Lei Mordaza a PSOE e a UP por ceder ao discurso da dereita e a ultradereita e alerta de que “mercar o relato das forzas conservadoras non fará que a esquerda teña máis apoio electoral, senón todo o contrario”.
Rego lembra as declaracións de Pedro Sánchez, antes de ser Presidente do Goberno, en que afirmaba que a Lei Mordaza “duraría o mesmo que o Goberno de Rajoy” porque sería inmediatamente derrogada. “Pasaron cinco anos desde que o PSOE está no Goberno, máis de tres do Goberno de coalición con UP e estas forzas incumpren o seu compromiso de derrogala” apunta.
A modificación da Lei Mordaza que propoñen PSOE e Unidas Podemos mantén os aspectos máis lesivos da lei do PP. 𝗔 𝘂́𝗻𝗶𝗰𝗮 𝗺𝗼𝗱𝗶𝗳𝗶𝗰𝗮𝗰𝗶𝗼́𝗻 𝗾𝘂𝗲 𝘃𝗮𝗹𝗲 𝗲́ 𝗮 𝘀𝘂́𝗮 𝗱𝗲𝗿𝗿𝗼𝗴𝗮𝗰𝗶𝗼́𝗻 𝗶́𝗻𝘁𝗲𝗴𝗿𝗮 𝗲 𝘁𝗼𝘁𝗮𝗹. Xa abonda de maquillaxes! pic.twitter.com/Cdo3TXcAtj
— BNG - Bloque Nacionalista Galego (@obloque) March 14, 2023
“Intentan reformala en moitos aspectos cosméticos, pero mantéñense os elementos centrais da Lei Mordaza. Aqueles precisamente que foron máis criticados polo conxunto da sociedade porque vulneran dereitos cívicos, dereitos democráticos e liberdades públicas” sinala Rego. Unha Lei, engade o deputado do BNG, que non repara na vulneración dos dereitos con tal de protexer a Policía. “Creada para atacar as protestas sociais e a disidencia política, con especial atención aos movementos soberanistas” subliña.
“PSOE e UP néganse a derrogar os aspectos centrais e nucleares da lei”: o artigo 36.6, que fala de desobediencia e resistencia á autoridade, considerado na lexislación vixente como infracción grave, da mesma maneira a negativa a identificarse. O mesmo no 37.4 que fala de infracción por falta de consideración a algún axente das Forzas e Corpos de Seguranza do Estado. “Tamén a negativa a prohibir as pelotas de goma, as devolucións en quente ou incluso como queda o principio de presunción de veracidade e o feito de que se considere suficiente a testemuña dos axentes para acreditar a comisión dun feito delitivo” denuncia. Así mesmo, adianta que na proposta formulada por PSOE e UP non se elimina a identificación preventiva das persoas aínda sen indicios da comisión dalgún delito.
“É un erro por parte de PSOE e UP negarse a derrogar realmente a Lei Mordaza, un erro que deriva da cesión ás presión do Estado profundo, incluso tamén dos sindicatos máis da ultradereita -JUSAPOL, JUPOL-” asevera Rego. Para o deputado do BNG, mercar o relato da dereita “non vai facer que esa pretendida esquerda que goberna teña máis apoio electoral, senón todo o contrario” finda.
