A viceportavoz primeira do BNG no Parlamento, Olalla Rodil, lamentou “profundamente” a falta de diálogo e de vontade negociadora que está amosando o Partido Popular de cara a última xornada do Debate do Estado da Nación, na que se debaterán as propostas de resolución de cada grupo.
O BNG presentou até trece ofertas de transacción coa vontade de chegar a acordos sobre os temas que de verdade preocupan ás galegas e aos galegos, para mellorar as condicións de vida da xente e facer que Galiza avance. Porén, o PP non ten amosado vontade de achegar posturas e ao longo desta tarde xa dixo non a acordos en temas de tanta relevancia como a saúde mental, dependencia, vivenda, infancia, lingua ou mocidade.
“O único que estamos recibindo por parte do PP é un non tras non tras non... un non a todo o que signifique avanzar en dereitos e en mellores condicións de vida para a xente deste País”, subliñou Rodil, para quen nestas negociacións “estamos vendo unha vez máis o PP de sempre, que aplica o seu rodete absolutista e que é incapaz de chegar a acordos en beneficio das galegas e galegos”.
Acordos para os que o Bloque tivo a man tendida, por exemplo, para mellorar a atención do Servizo de Axuda no Fogar. Xusto o día no que o Ministerio de Dereitos Sociais fixo públicos datos que sitúan a Galiza como a cuarta comunidade de todo o Estado na que máis se agarda pola axuda da dependencia —393 días de espera e máis do dobre do que marca a lei—, o PP rexeitou negociar unha mellora da financiación deste servizo, tal e como propuxo o BNG.
De igual xeito, o PP dixo xa non a cuestións como a gratuidade dos libros de texto, a ampliar os recursos nos centros educativos para a atención á diversidade ou mellorar o financiamento das universidades. Tampouco amosou vontade de acordo en cuestións relacionadas coa vivenda, a administración local, pesca ou violencia machista.
