O “boicot político” do Partido Popular á declaración de zonas de mercado tensionado (ZMT) fará perder a Galiza financiamento estatal e desincentivará a promoción de vivenda pública e protexida. Así o denunciou a portavoz de Vivenda do BNG, Alexandra Fernández, na Comisión 2ª do Parlamento, na que advertiu que a política anti-ZMT da Xunta “xa non vai afectar só a quen padece dunha forma máis directa a crise da vivenda, impedindo que baixen os prezos, senón que vai supor un lastre para os promotores, xa sexa a propia Administración ou privados”.
As axudas previstas no borrador do novo Plan Estatal de Vivenda para adquisición pública por parte de entidades do terceiro sector pasan do 70 ao 85 % no caso de ZMT, argumentou Alexandra Fernández. No caso de promoción ou rehabilitación sobre solo público, tanto de vivenda de promoción pública como de promoción privada en réxime de protección, a axuda contemplada é do 70 % e 1.000/m², podendo alcanzar o 80 % e os 1.200/m² se está en ZMT. Para VPA en solo privado, as axudas previstas son do 55 % do investimento e 750/m², pero poden chegar ao 65 % e 950/m² nas zonas tensionadas.
Alexandra Fernández advertiu que, cos datos na man, o Executivo de Rueda non ten argumentos para opoñerse á declaración de mercados tensionados. Tampouco os ten, engadiu, para boicotear aos concellos con “criterios puramente arbitrarios” que non están contemplados na lei estatal de Vivenda que regula as ZMT. “Coas competencias na man, tampouco teñen argumentos para fuxir do seu deber de facer a declaración de mercados tensionados de todos os concellos galegos”, agregou.
Mentres o prezo baixa en Cataluña, en Galiza sobre un 7,2 %
Segundo expuxo a deputada do BNG, a “total desregulación” que defende o PP está deixando xa en Galiza prezos máis caros e menos oferta no mercado da vivenda. Así se constata, por exemplo, na cidade da Coruña, onde o prezo medio do alugueiro subiu de 679 a 733 euros, e o número de contratos baixou de 6.045 a 5.478 contratos entre 2023 e 2024, antes da declaración de ZMT.
No caso de Vigo, subliñou, a evolución é similar: o prezo medio pasou de 648 euros a 695 e os contratos baixaron de 5.484 a 5.070. Son datos, asegurou, que desmontan o argumento de que as ZMT reducen a oferta de pisos en alugueiro convencional, sostivo Fernández, quen destacou que en Cataluña, que conta co “experiencia máis consolidada” como ZMT, os prezos do alugueiro reducíronse un 5 % no primeiro trimestre deste ano con respecto ao mesmo período do 2024, mentres en Galiza no último ano subiron un 7,2 %.
A portavoz do BNG emprazou á Xunta a exercer as súas competencias e a facer a declaración de mercados tensionados de todos os concellos galegos, aos que o PP carga agora cunha responsabilidade que non lle corresponde e que en moitos casos non poden sequera executar por falta de medios.
Mobilización de vivenda baleira e regulación do mercado turístico
No transcurso dunha pregunta formulada ao director xeral de Vivenda, Heriberto García, a deputada nacionalista defendeu, neste punto, que para lograr a redución de prezos e o aumento da oferta en alugueiro, a regulación de mercados tensionados ten que ir acompañada de mobilización de vivenda baleira e da regulación dos mercados alternativos de alta demanda, como son o turístico e o de tempada.
“Ao PP isto non lle gusta porque significa activar políticas públicas fronte ao modelo da lei da selva, de especulación desenfreada e cero perspectiva social da vivenda como dereito a garantir”, recalcou a deputada, quen quixo deixar claro que o obxectivo das ZMT é que os alugueiros non medren por riba do custe de vida e que só para grandes tenedores ou para vivendas que estivesen sen alugar máis de cinco anos implicaría a limitación de prezos conforme ao índice de referencia.
“Na gran maioría de contratos non se estaría obrigando a baixar prezos, senón a poder incrementalos dentro duns límites para garantir que a economía das familias e o custe deda vivenda non sexan cada vez máis diverxentes”, precisou.
