O deputado do BNG no Congreso, Néstor Rego, carga duramente contra o Presidente do Goberno, Pedro Sánchez, durante a súa comparecencia na cámara baixa pola súa política de incremento do gasto militar e polo papel do Estado español no seo da OTAN. Rego acusa Sánchez de carecer de lexitimidade para presentarse como contrario ao militarismo e á presión dos Estados Unidos.
Sobre o Consello Europeo e a cimeira da OTAN
“Sr. Sánchez, vostede vén hoxe aquí a presentarse como o adaíl da oposición ao aumento do gasto militar e ás exixencias de Trump. Mais non ten ningunha lexitimación para iso. Ningunha” subliña o deputado nacionalista. De facto, Néstor Rego sinala que, malia que Sánchez afirme que o Estado español manterá o gasto militar en 2,1% do PIB, o propio Presidente asinou o acordo da OTAN para elevar esa cifra até 5%, sen que exista documentación oficial que avale unha suposta “excepción” para o Estado español.
Rego advirte que mesmo ese 2,1% xa “supón un gasto desproporcionado” e “unha barbaridade” porque esa porcentaxe do PIB “xa implicará inevitabelmente detraer recursos de políticas sociais.”
O deputado do BNG critica con dureza o que considera unha deriva belicista do executivo español, comprometido cunha estratexia liderada polos Estados Unidos e executada a través da OTAN. “Vostede enfiou, desde hai tempo, o Estado español nunha dinámica belicista comandada pola OTAN e ao servizo do imperialismo norteamericano que, nunha constante escalada, leva inexorabelmente a alimentar a espiral da confrontación e á militarización da sociedade.”
Nin 5%, nin 2%: o BNG aposta pola paz e as políticas sociais
Rego sostén que a clave non é a porcentaxe do gasto militar, senón a aposta política entre guerra e paz, e cualifica de “inxustificábel” destinar recursos a armamento en lugar de atender necesidades sociais reais. Neste sentido, o deputado do BNG lembra o incremento récord nos últimos orzamentos aprobados de Defensa: “pode vostede durmir tranquilo sabendo que está colaborando na perigosa estratexia militarista da OTAN e dos EUA e comprometendo diñeiro que se acabará por detraer de sanidade, educación, servizos sociais, vivenda ou pensións?” pregunta Rego a Sánchez durante a comparecencia.
Denuncia a complicidade da Unión Europea coas actuacións de Israel en Palestina
Durante a comparecencia do Presidente do Goberno, Néstor Rego recrimina -máis unha vez- o papel submiso e o silencio cómplice da Unión Europea ante o xenocidio que está a cometer o Estado sionista de Israel contra o pobo palestino.
“A ameaza está nun Estado colonial de Israel que após ter ocupado xa a maior parte do territorio da Palestina está a masacrar a poboación de Gaza nun xenocidio televisado. Israel non só é unha ameaza, Israel é inimigo da humanidade” subliña o deputado.
Saída da OTAN e a súa disolución
Rego reafirma a posición do BNG en contra da OTAN e reclama a saída do Estado español da alianza militar, propoñendo, cando menos, un referendo con garantías. “Non precisamos da OTAN e o único que lle reclamamos é que se disolva, polo ben da humanidade. En todo o caso, reclamamos que o Estado español se retire da OTAN. No mínimo é preguntar á cidadanía que opina. E a poder ser que esta vez o referendo non estea trucado como o que no seu día realizou Felipe González” salienta.
