A portavoz nacional e candidata do BNG á Presidencia da Xunta de Galiza, Ana Pontón presentou esta mañá en Compostela, a campaña “Mellor local, mellor galego” para potenciar o comercio local, consumir produtos galegos e dinamizar as vilas e cidades.
Nesta liña, anunciou que se é elixida presidenta comprométese a cumprir cos compromisos adquiridos co conxunto da cidadanía e co sector do comercio comezando pola posta en marcha dunha “nova Lei de comercio” pactada co sector para abordar entre outras cuestións: os horarios, ordenar as rebaixas, mellorar a calidade e poñer “fin a desregulación que levo adiante o Partido popular” prexudicando ao pequeno e mediano comercio e impedindo que poida competir coas grandes superficies comercias.
O obxectivo desta nova lei, recalcou á candidata á presidencia da Xunta de Galiza, é “apoiar o pequeno e mediano comercio do noso país” e darlle unha lexislación que se adapte a nosa realidade.
Por outra banda, tamén anunciou a posta en marcha dunha gran plataforma online , unha Amazon galega, con participación pública e privada para que o comercio e os produtores locais teñan un espazo de vendas neste ámbito no que existe un nicho de mercado cada vez máis importante, explicou.
“O noso comercio deber ser planificado” e dende o BNG apostaremos por elaborar un mapa de ordenación dos recursos comerciais e engadiu que mentres ese mapa non sexa aprobado “aplicaremos unha moratoria ás grandes superficies comerciais”.
O goberno que aspiro a presidir, afirmou Pontón, “ fenderá que as persoas produtoras obteñan o máximo beneficio, porque son ela as que fan o traballo duro e as que nos aportan alimentos de calidade, ademais de manter vivo e activo o noso medio rural”.
Todas somos conscientes do efecto demoledor que provoca ver unha rúa convertida nunha sucesión de persianas pechadas e de locais baleiros. E, por contra, o efecto positivo no económico e no social, de ter un comercio local vivo e dinámico. Desde 2009, pecharon máis de 12.000 pequenos e medianos comercios, en parte polas sucesivas crises, pero tamén porque estamos ante un goberno do PP que non presta apoio a este sector, e aí están os datos dos orzamentos.
En 2024 a partida de promoción e regulación do comercio interior é de 22 M€, 13 menos que en 2009.
Pontón destacou que o comercio local caracterízase pola súa “calidade, trato personalizado, produto coidado e diferenciado” e con produtos singulares que dan unha produción que as grandes superficies comerciais nunca van a acoller.
A candidata nacionalista á presidencia da Xunta reiterou a falta de medidas do PP durante 14 anos de goberno e a ausencia dunha “política clara” dirixida ao comercio local como reflicten os orzamentos do 2024, cun “apoio sensiblemente inferior ao comercio local”.
O BNG SOLICITA A COMPARECENCIA DO CONSELLEIRO DE SANIDADE NA DEPUTACIÓN PERMANENTE PARA EXPLICAR A GRAVE SITUACIÓN DO COLAPSO SANITARIO
Por outra parte, Pontón tamén se referiu a grave situación de colapso nas urxencias que se están a producir durante estes días na práctica totalidade da áreas sanitarias de Galiza e “sen chegar aínda ao pico máis álxido da gripe”.
Ao seu xuízo, este colapso das urxencias é consecuencia dos continuos recortes, “recortes e máis recortes de 14 anos de PP, sobre todo en atención primaria, onde temos un recorte nada menos que de 2.139 millóns de euros con respecto a 2009”.
O PP dedicouse “a dinamitar a Atención primaria” e se primaria non funciona o resto dos servizos colapsan. É necesario, afirmou, “poñer fin a esta política de recortes” e de deterioro da base do noso sistema sanitario.
Dende o BNG solicitamos a comparecencia do conselleiro de Sanidade na Deputación Permanente porque a situación na sanidade “é moi grave” e deben adoptarse medidas de maneira urxente para dar resposta a todas esas persoas que acoden ao servizo de urxencias.
“O meu compromiso é ser a presidenta dun goberno que teña como prioritario blindar a sanidade pública, en particular a Atención primaria, porque estamos falando da saúde das persoas” e entre as medidas que adoptarei nos cen primeiros días de goberno como presidenta da Xunta, se teño a confianza da cidadanía, será “aprobar un plan de choque de 200 M€ para reforzar atención primaria”, concluíu.
