A portavoz nacional, Ana Pontón, sigue coa súa axenda de reunións coa colectividade galega en Arxentina e, tras a xuntanza coa directiva do Colexio Santiago Apóstolo, institución cultural de referencia, mantivo nun encontro no Centro Galiza de Bos Aires, onde tivo oportunidade de trasladar as alternativas do BNG a favor da emigración. Neste sentido, avanzou que a formación nacionalista vai aproveitar a tramitación dos orzamentos de 2026 para reclamar no Parlamento, vía emenda, un incremento do 50% no financiamento para facilitar o retorno dos galegos e galegas que así o desexen.
“Galiza é un País de acollida e cun gran potencial que precisa man de obra en moitos dos nosos sectores produtivos: no sector mar-industria, no sector agrogandeiro como factor importante para revitalizar o medio rural, no sector da construción e dos servizos. E desde o BNG propoñemos unha Galiza aberta e inclusiva, onde todos os galegos da emigración son benvidos”, subliñou.
Neste sentido, a proposta do Bloque é aumentar as partidas orzamentarias destinas a facilitar o retorno de emigrantes galegos, até acadar os 21 M€. “Se realmente apostamos por atraer talento e man de obra formada, hai que ser ambicioso no financiamento”, explicou. Trátase dunha proposta viable, tendo en conta o orzamento supera os 14.200 millóns de euros para o vindeiro exercicio, mentres que os programas para facilitar o retorno e a integración dos galegos emigrados non acadan nin o 0,1%, apenas 14 M€.
“É unha medida a favor do dereito da emigración a retornar e, ao mesmo tempo, é unha medida que favorece a Galiza, ós sectores económicos estratéxicos e que tamén fortalecería unha poboación lastrada polo envellecemento”, alegou.
Na súa visita ao Centro Galego de Bos Aires, acompañada pola eurodeputada Ana Miranda, Pontón tamén puxo sobre a mesa a necesidade de que a Xunta teña unha maior implicación na conservación do rico patrimonio cultural da diáspora, con pezas tan emblemáticas como a obra de Castelao A última lección do mestre. Neste sentido, a líder do BNG é partidaria de establecer un plan plurianual, que garanta un financiamento estable e regular, para colaborar coa diáspora na preservación e posta en valor do legado cultural acumulado durante décadas.
Dentro dos contactos con forzas de esquerda da rexión, e tras a reunión co ministro da Gobernación da provincia de Bos Aires, Pontón mantivo un encontro coa ex-presidenta Cristina kichner, a quen trasladou todo o apoio do BNG ante o que considera un claro caso de lawfare, similar ao sufrido por outros líderes e mandatarios da rexión, como o actual presidente do Brasil, Lula da Silva, unha utilización da xustiza que tivo como fin impedir que volvese competir nunhas eleccións presidencias.
Na xuntanza, analizaron a situación da política da rexión e a xeopolítica internacional, e coincidiron en compartir a súa preocupación polo avance da extrema dereita, simbolizada no caso de Arxentina, no goberno de Javier Millei, un avance das forzas ultra que Pontón considera un ameaza para a democracia e para o mantemento dos dereitos e liberdades colectivas e individuais.
Neste contexto, a portavoz nacional trasladou o seu orgullo polo feito de que en Galiza a extrema dereita teña nula representación institucional, o que atribuíu a que a cidadanía ten no BNG unha alternativa ao PP a favor da maioría social, fronte a un Partido Popular cuxo discurso e propostas se asemellan máis as da extrema dereita.
