O BNG aborda a elaboración do seu programa de goberno cunha xornada de traballo sobre I+D+i con unha ampla representación da comunidade científica e investigación no ámbito académico e empresarial.
Na apertura da xornada, a portavoz nacional do BNG, Ana Pontón avanzou que o programa de goberno do BNG recollerá as propostas e alternativas da comunidade científica, tanto no ámbito académico como no empresarial e comprometeuse a impulsar “un gran Pacto galego pola ciencia” nos primeiros cen días de goberno, se a cidadanía lle outorga a súa confianza.
“Un gran pacto pola ciencia que coloque a Galiza na vangarda dos países máis avanzados en investigación e innovación e quero darlle a Galiza un goberno que aposte pola ciencia”, recalcou.
Na súa intervención fixo fincapé nos grandes retos aos que nos enfrontamos e para os que precisamos, apuntou, a ciencia e a innovación. Retos, dixo, como o cambio climático, a xestión de residuos, o envellecemento da poboación; a biomedicina, intelixencia artificial e novas tecnoloxías, así como a prestación de servizos nunha sociedade do benestar que busca a xustiza social e a preservación do territorio
O goberno do cambio que quere liderar o BNG será o goberno da ciencia
Se realmente pensamos que a ciencia é unha aposta estratéxica, explicou a líder do BNG, ten que contar con recursos económicos humanos. Para acadar este obxectivo urxe un financiamento estable e suficiente, achegándose á media da Unión Europea, un programa de recursos humanos integral para todas as etapas da carreira investigadora e que achegue estabilidade e planificación aos nosos investigadores e investigadoras.
Nesta liña, anunciou, alternativa do BNG, ten como piares esa dobre vertente, con propostas concretas e realistas para colocar Galiza na vangarda científica, dentro dese gran Pacto galego pola ciencia.
Dende o BNG queremos “impulsar a I+D+i como sector estratéxico e panca de desenvolvemento social, económico e cultural. Temos claro que xerar coñecemento é en si mesmo un sector produtivo dos máis importantes para o presente e futuro do País” e por iso defendemos crear o INNOGAL, un “organismo público concibido como plataforma estábel para facilitar a xeración de ciencia”, e cunha xestión eficaz e eficiente dos recursos económicos, humanos e materiais. Tamén imos poñer en marcha un programa de retención, captación e retorno de talento investigador, semellante aos xa existentes en Euskadi (Ikerbasque) e Catalunya (iCrea), con excelentes resultados como o iCrea con 780 Millóns de euros para fondos de investigación dende a súa creación no ano 2001.
O ikerBasque, creado en 2007, engadiu Pontón, conseguiu un retorno de 175 M€ só no último ano. De feito, o País Vasco é a CCAA que lidera o investimento en I+D+i cun 2,2% do seu PIB, porcentaxe que duplica o de Galiza, e tamén lidera o retorno per cápita de fondos europeos, porque case triplica a media estatal.
Hai un dato, facilitado polo Foro Económico que debemos ter moi presente: o custe de perda de talento investigador cada ano chega até os 311 millóns de euros. Cada ano, recalcou.
2,5% do PIB de aquí ao 2030 para ciencia e innovación
Outra das propostas que integran a alternativa do BNG é crear o Consorcio galego de captación e competencias dixitais coa participación da Xunta, as entidades locais e o sistema universitario. O obxectivo é avanzar na dixitalización das administracións e das empresas, con especial atención ás PEMES e á economía social e tamén dixitalizar o ensino e centros de saber, como bibliotecas e arquivos.
Todas estas propostas deben ser financiadas para conseguir colocar a Galiza na vangarda da ciencia e investigación e por iso, propoñemos “destinar á ciencia e innovación o equivalente ao 2,5% do PIB de aquí a 2030”, para situarnos na media europea e sacar a Galiza do furgón de cola onde está hoxe cun investimento que apenas chega ao 1% do PIB.
A alternativa do BNG pasa, volveu a sinalar a nacionalista, por “reforzar o sistema de I+D+i nas universidades”, porque é o principal foco de ciencia e investigación que temos no País, e debemos maximizar a colaboración entre universidade, empresa privada e administración pública.
Apostar pola ciencia e a investigación é apostar por un novo modelo económico sustentable e de vangarda. O gran Pacto galego pola ciencia está destinado a desenvolver toda a nosa capacidade produtiva, crear emprego de calidade e construír unha economía sólida e competitiva asentada no potencial do País, tanto nos sectores produtivos tradicionais como emerxentes, concluíu a portavoz nacional do BNG.
