A portavoz nacional, Ana Pontón, desprazouse a Carballo para acompañar a Evencio Ferrero no pleno municipal convocado para presentar a súa renuncia a Alcaldía, tras 22 anos como rexedor e máis de catro décadas na corporación, pleno ateigado de veciños e veciñas que quixeron compartir co alcalde a súa despedida.
Ao inicio do acto, a líder do Bloque destacou que Ferreo foi o mellor alcalde da historia de Carballo, “líder dun equipo extraordinario de homes e mulleres que pensaron Carballo en grande, que traballaron con humildade pero con ambición, ao lado da xente, sempre coa man tendida”.
Evencio Ferrero, subliñou, pon fin a unha traxectoria política “impecable e extraordinaria, e isto non é unha apreciación persoal motivada pola admiración e polo inmenso aprecio que lle teño”, declarou a líder do BNG, “senón que falan os feitos, a realidade dun Carballo que hoxe é un referente de dinamismo económico, social e cultural en toda Galiza”.
“Para min unha honra poder dicir que o éxito de Carballo é o resultado dun proxecto político claro, que demostra a capacidade do BNG de transformar en positivo e de mellorar a vida da xente nos concellos que goberna. Carballo é un éxito, o exemplo da Galiza que o BNG quere poñer en marcha, desde a confianza, desde o orgullo de saber que somos un gran País e un gran pobo”.
O mellor recoñecemento a Evencio é continuar traballando polo Carballo en grande que deixa como legado, indicou, convencida de que así vai ser, que o proxecto do BNG para Carballo “vai seguir con paso firme e con forzas renovadas”, impulsado por Dani Pérez, unha persoa que comparte co até agora alcalde o seu profundo coñecemento do concello e a súa paixón por Carballo.
“Os veciños e as veciñas poden ter a seguridade de que Carballo seguirá na mesma senda de progreso e de avance con Daniel Pérez que, ademais de contar cun equipo de goberno extraordinario, tivo a oportunidade de aprende do mellor”, concluíu.
