Co obxectivo de reforzar e ampliar o autogoberno da Galiza, o BNG urxe convocar a Comisión Mixta Xunta-Estado e avanzar no traspaso de máis de corenta competencias como a Xestión do Ingreso Mínimo Vital, Tráfico, as autoestradas AP-9 e AP-53, Portos e Paradores, inspección de traballo, meteoroloxía ou os centros de investigación con sede na Galiza. Lamentabelmente, as forzas estatais con representación na cámara galega -PP e PSOE- votan en contra e conseguen vetar a proposta do BNG.
“O Partido Popular aclarou hoxe que non aspira a desenvolver nin as competencias que están recollidas no Estatuto de Autonomía nin aquelas que o Parlamento de Galiza reclama pola unanimidade dos grupos. Tampouco o PSOE desmostra ningunha convicción para cumprir e transferir as competencias pendentes” denuncia o deputado nacionalista. Así mesmo, Rego lembra que ambas as dúas forzas estatais, PP e PSOE, votan afirmativamente no Parlamento Galego mais, pola contra, en Madrid votan diametralmente a oposta.
Obxectivo da iniciativa: máis capacidade para a Galiza
A Comisión de Política Territorial do Congreso foi o espazo onde se debateu a iniciativa do BNG que tiña por obxectivo demandar a convocatoria urxente da Comisión Mixta Xunta-Estado para negociar o traspaso das competencias pendentes á Galiza.
Entre as corenta competencias enumeradas polo BNG destaca a transferencia en materia de Tráfico e Seguranza Viaria e desenvolver a policía galega, a xestión do Ingreso Mínimo Vital e a do dominio público marítimo-terrestre, os Servizos e infraestruturas viarias e ferroviarias como a AP-9 e a AP-53, Portos de Interese Xeral e os Paradores localizados na Galiza, obras hidráulicas ou a xestión da Confederación Hidrográfica Miño-Sil.
Así mesmo, a iniciativa do BNG tamén propuña “transferir á Galiza” Salvamento Marítimo e os medios de loita contra a contaminación mariña; os servizos sanitarios e asistenciais a traballadores e traballadoras do mar (ISM); inspección de traballo; meteoroloxía; os centros de investigación con sede na Galiza; as funcións e servizos de Institucións de Penitenciarías ou as competencias en materia de emigración e inmigración.
“A Galiza debe ter presenza en entidades do carácter estatal como o Banco de España, Comisión Reguladora do Mercado de Valores, Portos do Estado, AENA, órganos de dirección e administración de empresas públicas con centros de traballo na Galiza e nas comisións reguladoras de servizos liberalizados” defende Rego.
Por outra parte, a iniciativa do BNG instaba a que o Goberno do Estado dese conta anualmente das xestións e acordos da Comisión Mixta, incluíndo todos os informes e escritos en relación coa convocatoria da Comisión e a demanda de transferencias.
Capacidade para decidir por si mesmo e concerto económico
“O BNG defende un novo status político de nación e un novo sistema de financiamento -baseado no concerto económico- que nos permita afrontar os retos de futuro con garantías, con capacidade para decidir sobre os asuntos que interesan aos galegos e galegas” sinala o deputado nacionalista. Para a organización nacionalista “é preciso ter recursos financeiros para fortalecer os servizos públicos e impulsar o desenvolvemento económico e o benestar social”.
En opinión de Néstor Rego, no actual contexto “é prioritario dar un salto adiante no autogoberno mediante a asunción de novas competencias que outorguen unha maior capacidade de respostas aos retos dunha nosa era”. A comezar, engade Rego, por asumir as competencias contempladas no actual Estatuto e transferir aquelas que están previstas mediante delegación do Estado por Lei Orgánica.
