A portavoz de Pesca do BNG no Parlamento, Rosana Pérez, esixiu á Consellería de Mar que, de maneira urxente e decidida, tome medidas para frear a expansión das especies invasoras na costa galega e, nomeadamente, da alga asiática, que segue a crecer malia que xa no 2024 foi detectada a súa presenza nas rías da Coruña e Vigo e tamén na boca da ría de Arousa.
“A Consellería non está a prestar a debida atención a un problema que se pode converter unha catástrofe polas consecuencias que a alga asiática ten sobre outras especies e, polo tanto, tamén sobre o sector do mar”, advertiu a deputada nacionalista que, neste punto, subliñou que este mesmo mes de xuño a frota da ría de Arousa volveu amosar a súa preocupación, “o seu medo” á expansión da alga, denunciando que “xa están perdendo de traballar por ter os aparellos cheos desta especie”.
A propia Asociación de Artes Menores (Anarme) anunciou que solicitaría unha reunión coa Xunta –da que nada se sabe– porque entenden, engadiu a deputada do BNG, que nin chega á frota información nin protocolos para evitar a propagación. Todo isto, engadiu, co precedente do que ocorreu nas costas de Cádiz no 2025, onde chegaron a recoller case 80 toneladas diarias de alga asiática no verán pasado.
“Os investigadores insisten en que o mellor remedio é a anticipación para tentar que non se reproduza aquí o que pasou noutras partes do Estado”, subliñou, para recriminarlle á Consellería non ter actuado de maneira decidida cando o problema comezaba a ser unha ameaza porque, precisou, “agora xa estamos ver, cada vez en máis puntos da costa, como sigue medrando”. De feito, expuxo, o pasado mes de xuño areais de Sanxenxo apareceron cheos de alga asiática.
É por iso que a deputada nacionalista urxiu á Consellería a intensificar a loita contra esta alga e preguntou, na Comisión de Pesca do Parlamento, se ten previsto, entre outras cuestións, algunha medida económica para paliar as perdas que xa lles está a causar á frota a alga asiática, ou se se está analizar se a súa propagación está a influír na perda de produtividade das rías, concretamente, na diminución “importantísima“ de bivalvos.
“Todo foi a peor”
Rosana Pérez lembrou que O BNG xa en marzo de 2025 levou a debate na Cámara unha iniciativa, rexeitada polo PP, na que, entre outras cuestións, se pedían informes sobre o risco de expansión das especies invasoras e sobre os seus efectos sobre a biodiversidade, así como medidas urxentes para evitar a súa expansión ou actuacións orzamentarias para mitigar a reprodución e protexer os ecosistemas e ao sector pesqueiro e marisqueiro ante o seu avance.
“Desde entón todo foi a peor”, lamentou a deputada nacionalista, que acusou os responsables da Consellería de acusar un “problema de miopía” para ver o que ve a xente do mar e os propios investigadores. “Mentres desde a Xunta se dicía que non tiñan constancia da alga asiática (en marzo deste ano) os investigadores xa a estaban detectando nas Cíes, na Costa de Oleiros, en Cangas e na contorna da Illa de Toralla”, destacou.
