O deputado do BNG no Congreso, Néstor Rego, alerta da necesidade de actuar con carácter inmediato na liña de ferrocarril de largo métrico que une todo o norte da Galiza, especialmente entre Ferrol e Ortigueira, ante a reiteración de incidencias graves, a deterioración do servizo e a falta de investimentos estruturais por parte do Goberno do Estado e defende a posterior transferencia á Galiza.
Segundo subliña o BNG, a situación da liña resulta “insustentábel” após novos episodios como o incendio recente nunha unidade ferroviaria e a acumulación de máis de 100 supresións de servizo en apenas uns meses, provocadas maioritariamente polo mal estado do material rodante e pola falta de unidades de substitución.
A formación nacionalista advirte de que a inseguranza do servizo é xa estrutural, con avarías frecuentes, cancelacións case diarias e falta de información e alternativas para as persoas usuarias. Esta situación afecta de maneira directa a conectividade das comarcas de Ferrol e Ortegal, agravando o illamento territorial e as dificultades de mobilidade.
Para o deputado do BNG, esta realidade contrasta co incremento das necesidades de transporte público nun territorio que precisa servizos ferroviarios “fiábeis, frecuentes e adaptados á realidade social e económica”.
Ante esta situación, o deputado nacionalista reclama ao Goberno executar investimentos urxentes de modernización, renovar o material rodante e reforzar o persoal de atención ao público tanto a bordo como nas estacións.
Transferencia e modelo de xestión máis próximo
Paralelamente, Néstor Rego insiste en que a solución de fondo pasa por unha mudanza de modelo: a transferencia da liña entre Ferrol e Ribadeo á Administración galega, de maneira que a infraestrutura e os servizos poidan ser xestionados con criterios de proximidade e eficacia.
Neste sentido, Rego lembra que outros territorios xa completaron procesos semellantes coa antiga rede FEVE, como Euskadi, Catalunya ou Andalucía, a través de operadores públicos propios, con resultados positivos no incremento de usuarios e na mellora do servizo
