Tal e como trasladara xa o deputado do BNG no Congreso, Néstor Rego, ao Presidente do Goberno, Pedro Sánchez, durante a rolda de consultas en Moncloa, a organización nacionalista mostra o seu rexeitamento ante os plans do executivo de aumentar de maneira exponencial o gasto militar. Para o BNG, o Goberno do Estado tería que centrar todos os seus esforzos na reindustrialización e a creación de postos de traballo que melloren a calidade de vida da cidadanía e apostar polas vías de diálogo e a paz.
“Sánchez dá unha versión dulcificada do que verdadeiramente se está facendo, insistindo moito no aspecto da seguridade e nas tecnoloxías de duplo uso” afirma Rego. Nestes casos, continúa, sabemos que o uso fundamental e prioritario será o militar e iso é a base do cuestionamento do BNG. Entendemos que é falso –mellor devandito, sabemos- que isto non vaia a implicar recorte nas políticas sociais. “Poida que sexa verdade que non se reducirá as partidas para fins sociais pero o que é incuestionable é que esas partidas non van aumentar” sinala Néstor Rego.
Desmentindo e desvelando as declaracións do Presidente
“Estes fondos anunciados por Sánchez estarían moito mellor destinados e terían maior importancia se fosen investidos a mellorar os servizos públicos, a mellorar o emprego ou destinalos a mellorar a calidade de vida e o benestar da poboación” apunta Rego.
Tampouco é verdade que se estea falando de política de defensa disuasiva. “Nunca queda claro onde está o límite entre a política disuasiva e a política militar ofensiva” evidencia Rego. O aumento de gasto e a compra de maior armamento leva consigo unha espiral de tensión e de confrontación que actúa sempre nun sentido negativo e perigoso. “O camiño debe ser a desescalada e non a vía pola que está a optar a Unión Europea” afirma o deputado do BNG.
Ademais, Néstor Rego desvela a ocultación realizada polo Presidente do Goberno a respecto da compra de armas a Estados Unidos. “Nos Orzamentos aprobados en 2023, no Plan Plurianual, xa se contempla a compra de mísiles e equipos tecnolóxicos a empresas norteamericanas. Non é verdade que só se vaia a comprar este tipo de produtos a empresas europeas” evidencia Rego.
“O que está a facer o Goberno do Estado, tal e como fai o conxunto da Unión Europea, é cumprir o que está a pedir Trump que fagan: gastar máis en defensa e comprar máis armas a empresas norteamericanas” lamenta Rego.
Neste sentido, o BNG rexeita a demagoxia que implica “ver esta escalada belicista que aumenta potencialmente o risco de confrontación militar e, por tanto, que pon en cuestión o futuro de paz e benestar do conxunto da poboación do Estado español e da Galiza”. Para a organización nacionalista, os esforzos do Goberno deben estar “centrados e orientados na reindustrialización e a creación de emprego no ámbito civil”.
