O PP négase a parar os desafiuzamentos e a dación en pago na execución hipotecaria

O portavoz de vivenda nacionalista, Cosme Pombo pediu a “paralización dos desafiuzamentos en trámite” e a aplicación da sentenza do Tribunal de Xustiza da Unión Europea

Cosme Pombo lamentou hoxe “o voto desfavorable do Partido popular” na Moción do BNG debatida no Parlamento galego que reclamaba: A dación en pago na execución hipotecaria, a paralización dos desafiuzamentos en trámite, acatar a sentenza do Tribunal de Xustiza da Unión Europea, adoptar medidas para manter as condicións pactadas en materia de vivenda protexida, estender a duración do contrato do programa “Aluga” e reclamar do Goberno do Estado a transferencia das vivendas en Galiza adquiridas polo SAREB ao de constituír un patrimonio público e garantir o dereito a unha vivenda digna.

O PP galego fidel aos ditados do PP de Madrid

Pombo afirmou que o Partido popular galego é “ fidel aos ditados do Partido popular que dirixe Mariano Rajoy” e considerou a posición do grupo parlamentario do PP na Cámara galega, resulta “novo ataque” ao dereito a unha vivenda digna.

O deputado do BNG, na súa intervención, afirmou que os desafiuzamentos son a consecuencia inmediata dunha “errónea política” inmobiliaria e crediticia ás que teñen contribuído de maneira moi favorable as entidades financeiras.

 Burbulla inmobiliaria que acrecentou o empobrecemento

O nacionalista denunciou que esa política afecta ao “dereito fundamental” a unha vivenda digna de cada galego e galega e nunha situación de crise económica, a influencia do sector financeiro foi “un dos principais culpables” do drama de moitas familias por mor da burbulla inmobiliaria que deu lugar ao “empobrecemento” a través do crédito hipotecario.

Para o parlamentario, “a rixidez do marco hipotecario” está a provocar que moitas familias non conten cunha alternativa á hora de non poder facer fronte ao pago da súa hipoteca, “nada de dación en pago e nada de conversión de contratos en arredamentos ou alugueres”, afirmou.

Os propietarios da vivenda deben, a maiores, asumir a perda da mesma sen que se produza un resarcimento da débeda “ estarán anos e anos hipotecados”, dixo o deputado, mentres o Goberno “sanea á Banca con cartos públicos e as familias son expulsadas das súas vivendas, a cidadanía perde dereitos e salarios e tamén servizos públicos básico”.

Mentres a cidadanía perde, “incluso a vida”, as entidades financeiras son saneadas con cifras millonarias de fondos públicos, concluíu Pombo.

 

 

 

 

Afíliate, faite do bloque
Anímate a dar o paso, súmate ao proxecto do BNG