O Consello Nacional do BNG, reunido o sábado, 28 de outubro, acordou a apertura do proceso de elección de candidata/o á presidencia da Xunta da Galiza. Animamos vivamente a toda a militancia a participar activamente deste proceso, que se verificará a través do seguinte método:
- Segundo marcan as normas de funcionamento en vigor do BNG, a decisión será tomada, colectiva e democraticamente, en votación polas asembleas comarcais do BNG en toda a nación e na asemblea da emigración.
- Poderase presentar candidata/o neste proceso calquera militante do BNG dado de alta na organización cun mínimo de dous meses de antelación á convocatoria do proceso (daquela, desde o 28 de agosto de 2023).
- Cada candidatura debe reunir un mínimo de 200 militantes con plenos dereitos que a avalen.
- O prazo de presentación de candidaturas establécese do 31 de outubro ao 13 de novembro (inclusive), até as 12.00 horas.
- As asembleas comarcais reuniranse no período comprendido entre os días 14 a 19 de novembro (inclusive). Debateranse e votaranse todas as propostas presentadas.
- A militancia do BNG encadrada na asemblea da emigración poderá participar deste proceso a través dun método de voto telemático con garantías de privacidade, e recibindo previamente información sobre todas as propostas presentadas. Este mesmo sistema será o utilizado para posibilitar a militancia do BNG que xustifique se encontre desprazada da comarca á que pertence ou motive a solicitude por causas de forza maior (laborais, estudos, de saúde etc)
- Efectuarase o escrutinio de todos os votos emitidos nas asembleas e os trasladados por vía telemática para o seu cómputo centralizado a nivel nacional.
- O Consello Nacional a reunir o 25 de novembro de 2023 proclamará como candidata/o elixida/o aquel ou aquela que obteña maior número de votos entre a militancia.
Consello Nacional
Bloque Nacionalista Galego
- Modelo para a recollida de avais: deberá ser cuberto e enviado escaneado ao correo electrónico [email protected]