Na Comisión de Transición Ecolóxica da cámara alta que se celebrará o vindeiro luns, 12 de maio, a senadora do BNG reclamará ao Secretario de Estado de Medio Ambiente rexeitar a posibilidade de que as Rías Galegas, nomeadamente a Ría de Arousa, sexan punto de depósito de materiais de dragados. Carme da Silva exixirá cancelar a autorización na zona de Sálvora, así como no conxunto de puntos das Rías Galegas, como zonas de dragados e instará o Ministerio a avaliar os impactos que poidan ter causados sobre os recursos pesqueiros, marisqueiros e sobre ecosistema mariño.
O Centro de Estudos e Experimentación de Obras Públicas (CEDEX), dependente dos ministerios de Transportes e de Transición Ecolóxica, vén de propoñer como prioritario para depositar os materiais dos dragados dos portos das rías de Arousa e Pontevedra, ou de calquera outro que non se sitúe a máis de 20 millas, o mesmo punto de vertido próximo á Illa de Sálvora que deixou de autorizar en 2021 e que o propio sector pesqueiro e marisqueiro da Ría de Arousa rexeitara unanimemente con anterioridade.
“O BNG, en concordancia co aprobado no Parlamento Galego no 2019, rexeita que as Rías Galegas, e nomeadamente a Ría de Arousa, sexan o depósito de toneladas de residuos que poden estar poñendo en risco o medio mariño. As Rías Galegas non poden ser un vertedoiro de residuos porque danan o ecosistema e os nosos sectores produtivos” enfatiza a senadora do BNG.
Carme da Silva cualifica de “despropósito” que se poidan verter nese punto máis lodos e que se manteña o depósito “sen que se estea a facer algún tipo de seguimento ou control das consecuencias do mesmo”.
Ademais de exixir o fechamento destes puntos de depósito, a senadora nacionalista demandará realizar un estudo sobre a situación deste depósito e o impacto que o mesmo pode estar causando nunha zona de tanta riqueza ecolóxica, pesqueira e ambiental. “Así mesmo, debe levar adiante unha avaliación dos impactos que estes sedimentos poidan ter causado sobre os recursos pesqueiros e marisqueiros” finda.
