Ana Pontón propón un investimento 320 M€ en proxectos de ciencia e innovación con cargo aos fondos europeos de recuperación

Presentación Vigo
Presentación Vigo

Entre os proxectos do Galiza Next, un Consorcio de investigación mariña con sede en Vigo que sexa un referente para o complexo mar-industria

Innogal, plan de captación e retorno, dixitalización de todos os campus e aposta pola investigación biomédica e situar o investimento no 2,5% do PIB

BNG presentou en Vigo os proxectos no ámbito da ciencia e da innovación incluídos no seu programa Xerar Futuro, Galiza Next cun investimento de 320 millóns de euros financiables con cargo aos fondos europeos de recuperación.  O obxectivo é sentar as bases dun novo modelo económico verde, vangardista e con capacidade de xerar emprego de calidade aproveitando todo o potencial do País.

“Antes da COVID xa era urxente apostar pola ciencia e a investigación para ter unha Galiza con futuro, pero a pandemia deixou en evidencia con toda crueza que un modelo baseado case en exclusiva no sector terciario non era o camiño correcto”, explicou a portavoz nacional, Ana Pontón, na súa presentación.

Por iso, o BNG propón crear un auténtico ecosistema de investigación e innovación  que facilite a integración da ciencia e a tecnoloxía empresarial e que, ao mesmo tempo, fortaleza a universidade como centro de transferencia de I+D+i. A líder nacionalista sintetizou os proxectos para conformar ese ecosistema científico.

En primeiro lugar, poñer en marcha o INNOGAL, un centro público de innovación que promova e coordine toda a I+D+i, similar ao Ikerbasque ou ao ICREA. Un centro que faga tamén un papel de captación e retención de talento investigador, cun Plan de captación e retención do talento que emigrou, ademais de definir a carreira profesional investigadora como antídoto contra a precariedade.

Unha fenda á que tamén aludiu a portavoz en Bruxelas, Ana Miranda: “capital humano formado aquí enche centros de investigación, empresas e universidades en todo o mundo, unha situación que se agravou coa chegada do Goberno do PP e a súa política de recortes, de tal xeito que se o gasto en I+D+i seguise ao mesmo ritmo, Galiza precisaría vinte anos para chegar á media estatal e 80 para chegar á medida da UE”.

A segunda peza dese ecosistema é fortalecer o sistema de I+D+i nas universidades, “por ser o máis importante foco de ciencia e investigación e da súa transmisión ao sector económico público e privado”, explicou, empezando pola dixitalización de todos os campus, “porque a universidade ten que introducir cambios estruturais e funcionais que lle permitan cumprir os obxectivos que a sociedade reclama”. Neste ámbito, o BNG aposta por potenciar os viveiros de empresas de base tecnolóxica, -as denominadas spin-off-, empresas a partir das ideas xurdidas dos grupos de investigación na universidade en calquera dos seus centros.

Como terceiro piar dese ecosistema científico, o impulso da investigación biomédica partindo dos centros de referencia cos que xa conta Galiza. E tamén inclúe a creación dunha empresa público-privada de fabricación de material de laboratorio para abastecer aos grupos, centros e institutos de investigación.

Camiñar cara ao 2,5% do PIB en ciencia e investigación

“Galiza ten que apostar pola ciencia e a investigación como base para desenvolver un novo modelo económico e para iso  hai que poñer en marcha unha auténtica revolución científica con medios materiais e humanos”, explicou Pontón, e para iso o Bloque formula un horizonte financeiro: incrementar os recursos á ciencia até acadar o 2,5% do PIB e situar Galiza á altura dos países máis avanzados do noso entorno.

Pontón tamén salientou o  proxecto de rexeneración produtiva das rías, cun investimento de 1.096 M€, centrándose na parte de I+D+i. Neste sentido, BNG propón a creación dun Consorcio de Coordinación da investigación mariña con sede na futura ETEA, por entender que Vigo é a ubicación idónea para este consorcio de investigación mariña pola súa tradición con mar, pola súa identidade ligada ao complexo mar-industria.

“Vigo non se entende sen o complexo mar-industria e o futuro dese complexo pasa pola ciencia e pola investigación”, indicou Pontón, quen avanzou que este consorcio seria o maior complexo científico e tecnolóxico europeo de investigación do mar. O seu labor: o estudo da contaminación e o cambio climático en relación co mar e as rías, usos de produtos do mar e de analizar o seu potencial en áreas como a alimentación, estética, biomedicina, biomateriais; a I+D+i en relación coa construción naval, apoio a sectores produtivos relacionados co mar ou desenvolver sistemas de obtención de datos e mediante big data.

Afíliate, faite do bloque
Anímate a dar o paso, súmate ao proxecto do BNG