Os deputados, Montse Prado e Daniel Rodas rexistran diversas iniciativas denunciando o incumprimento dos compromisos da consellería do Mar, a escasas semanas do inicio do libre marisqueo
O BNG rexistra diversas iniciativas no Parlamento galego instando á Xunta a adoptar medidas para frear a situación dramática que está a vivir o sector do marisqueo da ría de Arousa.
Os deputados xustifican a aplicación urxente de medidas ante a falta de capturas nos Lombos do Ulla, a excesiva presión sobre O Cabido e O Bohído e a desaparición dunha especie estratéxica como é o berberecho, situación que comezou no ano 2012 coa caída de captura na ría de Arousa de 350.067 quilos , a máis baixa dende o ano 1997 e que posteriormente confirmou que a especie padecía unha alta mortaldade polo parasito Marteilia cochilia.
Por outra parte, os deputados Montse Prado e Daniel Rodas tamén denuncian o incumprimento dos compromisos esgrimidos pola consellería do Mar así como a falta de dialogo da administración co sector.
O BNG reclama medidas urxentes contra a crise marisqueira que está a impedir a actividade das familias que dela viven e que deben enfrontarse a a un futuro desolador que mesmo pode provocar o abandono da súa actividade.
