As enquisas indican que o Bloque vai ter presenza nos concellos de todo o país e que gobernará alcaldías moi importantes, asegura
O portavoz nacional, Xavier Vence, declarou desde Vigo na manifestación conmemorativa do Día das Letras Galegas que o 17M é un día de orgullo do principal sinal de identidade que temos como país, e proclamou que o futuro de Galiza vai ligado á supervivencia do seu idioma como sinal de identidade do pobo galego, que quere contribuír ao mundo desde o galego e co galego.
Salientou ademais que a creación cultural en base ao noso idioma en todos os eidos é tamén motor de riqueza e emprego e de posibilidades de desfrute para a cidadanía, e instou ás institucións a asumir un compromiso claro co galego para, sobre a base do noso idioma, facer cultura, facer país e facer unha sociedade orgullosa de si mesma, argumentou.
Neste sentido, Vence puxo en valor a defensa da lingua que exercen os concellos do BNG e os centos de concelleiros e concelleiras que traballan desde os municipios de todo o país.
Alí onde gobernamos hai un apoio claro ao idioma, ao teatro, á música, á produción cultural popular na nosa lingua, e o 24 de maio a cidadanía galega ten a oportunidade de optar por candidaturas comprometidas con noso idioma e co futuro do noso país, alegou.
Por contra, vemos en campaña un Feijóo que fai uso sistemático do español para dirixirse aos galegos e galegos, desprezando o idioma do país como nunca ten feito antes ningún presidente da Xunta, criticou. Vence interpelou directamente a Feijóo para lembrarlle que incluso incumpre a obriga institucional de promover a lingua propia que recolle o Estatuto de Autonomía.
Superar as enquisas
En relación as enquisas, o dirixente nacionalista considera que amosan un escenario aberto, no que o BNG-Asembleas Abertas vai seguir explicando o seu proxecto para convencer aos indecisos, desde o convencemento de que hai moita xente que é consciente e aprecia que alí onde goberna o BNG os concellos son transparentes e honestos, capaces de dinamizar o tecido económico local, comprometidos coa cultura e coa xente moza.
Vence subliñou que as enquisas deixan claro que a alternativa nacionalista de BNG-Asembleas Abertas vai ter presenza en todas as corporacións e que imos ter o goberno de moitas alcaldías importantes na nosa nación. Estamos confiados en que imos superar con creces o que hoxe poñen de manifesto as enquisas,concluíu.
