O Consello Nacional do BNG aprobou hoxe o programa e candidaturas ao Congreso e Senado, candidaturas, que en palabras da portavoz nacional, Ana Pontón, están conformadas por persoas que “suman e miran cara o futuro”. Nun escenario sen maiorías absolutas, afirmou, “1, 2, 3 deputados e deputadas do BNG son máis útiles para Galiza que 23 ao servizo de Sánchez, Casado ou Iglesias”.
Tras manifestar o seu orgullo como muller, feminista e galega pola masiva participación na folga das mulleres e mobilizacións do 8M, Pontón salientou a solvencia, compromiso e amplitude de onda das persoas que conforman as candidaturas do BNG ao Congreso e Senado.
Por Lugo, Maite Ferreiro, da que destacou a “forza e o talento dunha muller feminista” ademais do seu labro como concelleira na cidade de Lugo.
Pola Coruña, Néstor Rego, “unha persoa con traxectoria, compromiso e capacidade incuestionable para dar voz en Madrid ao noso país, como o fixo antes noutros espazos e lugares, desde o traballo pola cultura na cidade de Compostela, na que foi tenente alcalde, ou á loita en favor dos dereitos e das liberdades democráticas e nacionais como os 19 de Meirás”.
Por Ourense, o avogado, Iago Tabarés que volve á primeira liña da política activa e do compromiso e ilusión polo BNG. Unha persoa, dixo que coñece como poucas Ourense e que xa traballou pola súa provincia desde o Parlamento Galego.
Por Pontevedra, Carme Dasilva, da que destacou a súa grande capacidade de traballo e intelixencia para converter a cidade de Pontevedra nunha referencia premiada mundialmente como modelo de urbanismo, mobilidade e igualdade.
Eles e elas, recalcou Pontón, “son os e as cabezas dunhas candidaturas para sumar polo noso país”, e ás que que se reincorporan voces que tamén estarán presentes como: O escritor Suso de Toro, na lista ao Congreso; a exdeputada Tareixa Novo que encabezará a lista do BNG ao Senado, e o actor Miguel Pernas e o debuxante Kiko Da Silva, que apoiarán as candidaturas do BNG para que Galiza conte cunha voz propia.
“Este é o momento de Galiza, pero tamén é o momento de non deixarse levar pola estratexia do medo que só quere que nada cambie”. Unha estratexia que pretende asustarnos con que ven o lobo, desde Andalucía. Pero o lobo, afirmou Pontón , xa está entre nós, é Feixóo e ese PP “antigalego, antisocial, antiigualdade, antimemoria histórica, e contrario aos avances sociais para corrixir as desigualdades e construír unha Galiza con máis capacidade e sobre todo, sen depender de ninguén”.
O dilema, asegurou, non está “entre o facherío militante e os que non quixeron derrogar a Lei Mordaza, a reforma laboral do PP e tampouco quixeron acabar coa agravio a Galiza nos orzamentos do Estado. O dilema é “se queremos cambiar o rumbo para que Galiza conte ou seguir nesta inercia que nos precariza e nos fai ser cada vez menos.Galiza non pode quedar sen unha voz que a defenda no Congreso, a partir do 28 de abril, concluíu.
