PARLAMENTO GALEGO

Manu Lourenzo: "A creación dunha universidade privada que non responde ao interese xeral senón ao de Abanca”

Manu Lourenzo
Manu Lourenzo
Manuel Lourenzo afea ao PP un proxecto de lei que habilita un “chiringuito” clasista e innecesario que duplica titulacións da universidade pública
Manu Lourenzo: "A creación dunha universidade privada que non responde ao interese xeral senón ao de Abanca”

“Esta universidade non se crea polo interese xeral, créase para favorecer os intereses privados de Abanca e do señor Escotet”. Con esta rotundidade rexeitou o portavoz nacionalista de Educación, Manuel Lourenzo, o ditame sobre o proxecto de lei de recoñecemento da primeira universidade privada en Galiza que o PP aproba en solitario no pleno do Parlamento galego, e que, segundo subliñou, supón de facto “unha alfombra vermella para a universidade privada que non precisa este país, mentres se seguen a poñer paus nas rodas á universidade pública, que é o que si necesitamos, unha universidade pública forte e ben financiada”.

Lourenzo recriminou ao PP unha “tramitación vergoñenta” na que Abanca “pasou por riba mesmo dos reitores da universidade pública” que, ao igual que o resto da comunidade educativa pública están “en contra deste proxecto de lei”. “O debate deste proxecto é un debate ideolóxico que coma todos os debates ideolóxicos pretenden vestir pola dereita cun traxe técnico”, reprobou, para engadir a continuación que “aquí non houbo nin debate técnico nin procedemental”, senón, segundo recalcou, “a visibilización de dúas posturas contrapostas: vostedes, señores do PP, defendendo a universidade privada e o BNG defendendo a universidade pública”.

Nesta liña afeou á bancada do grupo parlamentario popular que apelara á “liberdade de empresa ou á liberdade de elección” cando esa liberdade de elección pasa polo “módico prezo de 50.000 euros por un título de grao”. “Iso que vostedes chaman liberdade é unha universidade clasista, elitista e segregadora”, reprochou, logo de afear ao PP que se amparase en modelos como o da Universidade Europea de Madrid, “que hai tres meses, en plena pandemia, declarou un ERE a 280 profesores e deixou na estacada a 26.000 alumnos e alumnas”.

O deputado nacionalista advertiu de que foi o propio sistema universitario galego, en todos os informes das tres universidades públicas, o que puxo de manifesto as irregularidades na tramitación deste proxecto de lei, cunha secretaría xeral de Universidades “convertida en axencia de publicidade da Xunta e actuando cal correa de transmisión dos intereses da Fundación Abanca”.

Logo de explicar a “enxeñería xurídica” empregada polo PP para salvar unha tramitación que cualificou de “fraudulenta”, Lourenzo recalcou que “este chiringuito” duplica titulacións xa existentes no Sistema Universitario Galego (SUG) e propón matrículas de 11.500 euros anuais de media por título. “Unha empresa que xa non é galega porque o PP lla regalou ao señor Escotet e á que agora lle regalan tamén a universidade galega para seguir forrándose a costa de prezos de matrícula desorbitados”, sentenciou.

O que vetou o PP: destinar o 25% a investigación e o 35% a bolsas

O portavoz de Educación tamén puxo branco sobre negro á negativa do grupo popular ante as distintas emendas presentadas polo BNG e, entre as que se atopan a proposta de que a universidade privada destine o 25% dos seus ingresos á investigación e o 35% a bolsas; someta a avaliación a súa calidade formativa; desenvolva un plan de igualdade por áreas e colectivos, así como un plan de atención ás persoas con discapacidade; articule un plan de promoción da lingua galega e regule o acceso do alumnado con respecto aos principios de igualdade, mérito e capacidade, garantindo en todo caso que non exista discriminación por razón de nacemento, raza, sexo, orientación sexual, relixión, circunstancias económicas, opinión ou calquera outra condición ou circunstancia persoal e social. “A ver se ademais de clasista e elitista, pretenden que sexa unha universidade de ideoloxía rancia e reaccionaria e intolerante”,

“A estas emendas tan sumamente revolucionarias que piden máis bolsas, máis investimento en investigación, máis controla da calidade ou máis respecto pola igualdade, pola lingua e pola diversidade sexual son ás que votou en contra o PP”, repasou para concluír que “fano porque é no que cren e, por iso, vostedes están coa banca, co señor Escotet e coa universidade privada e nós estamos onde estamos, coa cohesión social e coa universidade pública”.      
 

Manu Lourenzo: "A creación dunha universidade privada que non responde ao interese xeral senón ao de Abanca”