O portavoz parlamentario advertiu que a comparecencia de Feijóo sobre medidas de impulso democrático, pode converterse nun lavado de cara e servir de pretexto para recortar dereitos
Tras a Xunta de portavoces celebrada hoxe no Parlamento galego para dar curso á petición da Xunta do pleno extraordinario no que comparecerá Núñez Feijóo de medias de impulso democrático, o portavoz do grupo parlamentario nacionalista, Francisco Jorquera anunciou que o BNG presentará propostas contra a corrupción e esixirá que Feijóo explique as súas perigosas relacións con Marcial Dorado e Pachi Lucas.
O PP utiliza o Parlamento de escenario e a deputados/s de ouvintes
Para o nacionalista, o Partido popular pretende utilizar o Parlamento galego como un escenario ou decorado no que os deputados e deputadas sexan os ouvintes polo que amosou o seu voto contrario ao formato de pleno extraordinario proposto pola maioría do PP, do que descoñecemos data e tempos de intervención, só sabemos que non poderán presentarse propostas para loitar contra a corrupción.
Por outra parte, Jorquera lembrou que Feijóo non compareceu antes do remate do período de sesión, comparecencia á que se comprometera).Pola súa parte o grupo popular tamén se opuxo, coa súa maioría parlamentaria a habilitar o mes de xaneiro. De feito,dixo, a Xunta de portavoces de hoxe estaba convocada para elaborar dúas comisión non permanentes e non unha comparecencia deste calado e con estas características.
Na Xunta de portavoces, explicou, non se informou do día que a presidencia do Parlamento ten previsto para o pleno extraordinario, nin se permitiu debater a súa estrutura, tempos de intervención do presidente da Xunta e dos grupos parlamentarios e ademais a maioría do PP impide que os grupos parlamentarios presenten propostas de resolución contra a corrupción como reclamou o BNG.
A institución básica dunha democracia é o Parlamento, recalcou o deputado, e debe ser este órgano quen decida que medidas son necesarias para a rexeneración democrática. Con este xeito de proceder, a Xunta e os órganos reitores da Cámara pretende utilizar o Parlamento para que Feijóo faga propaganda. Se esa é a intención do PP mal empezamos e o que aconteceu hoxe avala a sospeita do BNG de que Feijóo quere un lavado de cara.
O PP rexeita sistematicamente investigar na Cámara galega os casos de corrupción
O portavoz do G.p do BNG lembrou que foi a maioría parlamentaria do PP a que vetou crear unha comisión para investigar a fraude dos cursos de formación, explicar as causas dunha interminable lista de imputados/as do PP en Galiza e paralizar a Comisión de Estudos para as medias contra a corrupción. O BNG, recalcou, presentará as súas propostas a pesar da maioría do PP porque existen liñas vermellas que nunca deben ser traspasadas.
Neste sentido asegurou que o impulso democrático non debe confundirse co recorte de dereitos e cuestionar agora a inviolabilidade dos deputad@s contradí a liberdade de expresión. Para combater a corrupción sistémica debemos atacar as súas causas entre elas, acabar coas portas xiratorias e impedir os recortes nos servizos públicos.
Jorquera concluíu reiterando que o BNG presentará unha batería de propostas nesta liña.