A Defensora Europea do Pobo expresa a Ana Miranda o seu interese por coñecer en detalle o procedemento do Alvia

Miranda e O´Reilly
Miranda e O´Reilly

A eurodeputada do BNG transmitiulle á Defensora o apoio á urxencia de realizar unha investigación independente do accidente como solicitaron as vítimas

A Defensora Europea do Pobo expresa a Ana Miranda o seu interese por coñecer en detalle o procedemento do Alvia

A eurodeputada do BNG, Ana Miranda, mantivo este martes, no  primeiro dia da lexislatura do Parlamento Europeo, un encontro coa Ombudsman (Defensora Europea do Pobo), a irlandesa Emily O´Reilly, para abordar o incumprimento da normativa europea en seguridade ferroviaria por parte do Estado español no caso do accidente do tren Alvia, ocorrido o 24 de xullo de 2013. Na xuntanza, a Defensora expresou a Miranda o seu interese por coñecer as causas do accidente e os detalles dos distintos aspectos sinistro, entre eles o procedemento de infracción aberto pola Comisión Europea contra o Estado español.

“Quero valorar o gran interese e dispoñibilidade amosado pola Valedora Europea do Pobo polo caso Alvia”, salientou a eurodeputada galega tras a reunión, quen lle trasladou o apoio do BNG á demanda solicitada xa polas vítimas do sinistro para que se leve a cabo unha investigación independente sobre o sinistro. “Unha investigación independente será a que determine as causas reais do accidente, porque a culpa do que aconteceu non é só do maquinista”, sinalou.

Para Ana Miranda, “a esperanza de atopar a verdade e a xustiza para as vítimas sigue estando en Europa”. Neste sentido salientou que é máis doado manter un encontro cunha Comisaria de Transporte da Comisión Europea como pode ser Violeta Bulc ou coa Defensora Europea do Pobo que cun ministro do Estado español “o cal non deixa en moi bo lugar nin ao Estado español nin ao ministro”, sinalou ao respecto.

Proceso 

A eurodeputada nacionalista explicoulle tamén a Emily O´Reilly que en 2017 o Bloque presentou unha denuncia contra o Estado Membro por incumprir a normativa europea de seguridade ferroviaria, denuncia que provocou a apertura dun procedemento de infracción contra o Estado español por parte da Comisión Europea o pasado xaneiro de 2019. En relación a ese proceso, o Estado pediu un aprazamento e acaban de enviar un plan para aplicar a normativa de seguridade ferroviaria, mais Miranda considera “que mentres non se faga por Decreto ou Lei, é como un papel mollado enviado a Comisión”.

Ao seu xuízo, debe de realizarse unha investigación independente “non como a que fixo o CIAF no 2015, que foi cuestionada pola Axencia Ferroviaria Europea (ARE) no 2016”, apuntou. “O novo Goberno debería empezar por levar a cabo esa investigación, tendo en conta a indefensión das vítimas do Alvia, que durante 6 anos non contaron co apoio dos sucesivos gobernos”, manifestou. 

“Seguirei loitando por esta causa, pola memoria das vítimas e porque se saiba a verdade nesta lexislatura europea, tal como prometín durante as eleccións, en base ao traballo realizado na pasada lexislatura, para chegar ao final, e unha palabra dada” afirmou a eurodeputada galega dende Estrasburgo.