Os concellos gobernados polo BNG anuncian que non van asinar os convenios que a Axencia Galega de Servizos Sociais pretende impor unilateralmente, modificando sen negociación previa as condicións polas que a día de hoxe se prestan servizos básicos nos centros de día e nas escolas infantís, e impoñendo un canón aos municipios que lles obriga a pagar 3.600 euros anuais por cada usuario no primeiro caso, e 1.500 euros, no segundo.
Nunha comparecencia antes os medios, o rexedor de San Sadurniño, Secundino García, resumía a posición dos alcaldes e alcaldesas do BNG: Non imos asinar estes convenios porque para os concellos é inasumible ter que pagar por prestar servizos que son competencia autonómica. Entre os custes que a Xunta pretende trasladar aos concellos, a alcaldesa de Moaña, Leticia Santos, citaba mesmo ao persoal das escolas infantís, e reclamaba da Xunta o mantemento e calidade deses servizos sociais.
Ata agora, os concellos tiñan convenios co desaparecido Consorcio do Benestar con condicións negociadas entre as partes. En liñas xerais, os municipios aportaban as infraestruturas, asumían o mantemento e mesmo persoal de apoio, segundos os casos. Pero co novo modelo que pretende impoñer a Xunta con estes convenios unilaterais, aplica un canon uniforme que deben pagar os municipios, explicaba o portavoz nacional, Xavier Vence,
Ningún concello está en condicións de aportar esas cantidades, advertiu Vence, quen augurou o fracaso deste modelo de recortes e privatizador dos servizos sociais que o goberno deseña a través da Axencia Galega de Servizos Sociais. É un fiasco, un fracaso máis produto das políticas de recorte de Feijóo, denuncia o dirixente nacionalista, quen criticou a extorsión aos concellos para obrigalos a entrar na nova axencia.
O BNG leva o debate ao Parlamento para que desde a Cámara saia un mandato claro instando ao Goberno a restaurar o consenso cos concellos, explicou a deputada portavoz de asuntos sociais, Carme Adán. Pedimos retirar os convenios unilaterais e que a Xunta se sente a escoitar e a negociar cos alcaldes e alcaldesas, que se establezan acordos con todos os concellos, ben de xeito bilateral, ben a través da Fegamp.
Vence sintetizaba as demandas do Bloque neste asunto: volver á senda do consenso cos concellos, recuperar o modelo público de prestación de servizos sociais, que a Xunta asuma o financiamento dos servizos que lle competen e frear a privatización de prestacións básicas que afectan aos nosos maiores e aos nosos fillos e fillas.
Á espera de reconducir a situación entre a Axencia Galega de Servizos Sociais e os municipios, o Bloque pide á Xunta que garanta o normal funcionamento dos centros de día e das escolas infantís e a apertura inmediata das negociacións cos concellos.
