O BNG pide á Xunta que protexa os fondos do Centro Galego en Bos Aires

Centro Galego de Bos Aires
Centro Galego de Bos Aires

Olalla Rodil lembrou que os fondos recollen unha parte fundamental do galeguismo e nacionalismo galego con obras de Blanco Amor, Otero Pedrayo, Risco e Castelao

O BNG pide á Xunta que protexa os fondos do Centro Galego en Bos Aires

A deputada do BNG, Olalla Rodil formulou hoxe unha pregunta ao goberno galego sobre o “futuro dos fondos do Centro Galego de Bos Aires”.

A parlamentaria lembrou que no centro seguen depositados un gran número de obras do patrimonio cultural de Galiza: arquivos sonoros e  documentais, cadros, e conferencias de Blanco-Amor, Otero Pedrayo, Risco e Castelo, “ un conxunto fundamental para coñecer e comprender a nosa historia desde comezos do século XX, e especialmente a partir de 1936.

O futuro do  Centro Galego, o seu patrimonio cultural, os servizos asistenciais e sanitarios, preocupa en  Arxentina á colectividade galega pero tamén en  Galiza territorial, explicou, e non só ao BNG, senón tamén a institucións estatutarias que se pronunciaron ao respecto recentemente, coma o Consello da Cultura Galega que ao igual que queremos facer hoxe nós, dixo,  lles lembrou a obriga legal que ten a Xunta de Galiza, disposta nos artigos 4 da Lei de Patrimonio e 27 da Lei de Galeguidade, explicou a nacionalista.

Para Rodil, no  Goberno recae a responsabilidade de salvagardar o patrimonio cultural galego no exterior, protexéndoo e garantindo que manteña a súa galeguidade. Poñéndoo en valor e difundíndoo para o seu estudo e coñecemento e  preguntou  si o Goberno galego mantivo  algunha reunión ou contacto con representantes da directiva do Centro e as  autoridades arxentinas e cal é a proposta  da Xunta para salvagardar  este  patrimonio.

Pola súa parte, o  conselleiro de  Educación despachou o asunto afirmando que a “Xunta estaría vixiante” ao que a  nacionalista respondeu que “ademais de vixiar, a Xunta debe “actuar para garantir a protección do inmenso patrimonio do Centro galego de Bos Aires”.

Ademais, Rodil reclamou remitir á cámara e de maneira periódica “información sobre as accións da Xunta a este respecto”.