O BNG non está disposto a tirar a toalla ante o rodillo da maioría absoluta do PP en relación ao caso Alvia e anuncia unha dobre actuación ante a Comisión Europea e ante o Parlamento galego, explicadas pola portavoz en Bruxelas, Ana Miranda, e pola portavoz nacional, Ana Pontón.
No primeiro caso, o Bloque vai presentar ante a Comisión Europea a solicitude de apertura dun procedemento de infracción contra o Estado español por incumprimento da normativa comunitaria en materia de seguridade ferroviaria, Directiva 2004/49.
En concreto, vulneración dos artigos 21 e 22 que recollen a obriga dos estados membros de contar cunha comisión independente para investigar accidentes ferroviarios graves, así como a obriga de escoitar as vítimas do sinistro a través dun procedemento de audiencia. O contundente informe da UE sinala o incumprimento de ambas obrigas legais.
A sociedade e desde logo as vítimas esixen respostas e é responsabilidade dos poderes públicos darllas, indicou Miranda, en particular co fin de esclarecer os feitos ata as últimas consecuencias e evitar que un accidente deste tipo volva repetirse nunca máis. O obxectivo desta denuncia no é buscar unha sanción senón garantir o cumprimento da normativa nunha cuestión de tanta transcendencia como a seguridade ferroviaria, aclarou.
No segundo caso, o BNG vai solicitar a vindeira semana a convocatoria da Deputación permanente co obxectivo de pedir un pleno extraordinario que debata a creación dunha comisión de investigación sobre o accidente de Angrois, por considerar que é unha débeda ética e política coas vítimas e co conxunto da sociedade galega.
Non imos ceder no noso empeño porque o noso deber é traballar para que se coñeza a verdade, explicou Pontón, quen cualificou de inexplicable que non se teña creado unha comisión parlamentaria ante un accidente, que tivo un impacto social e emocional tan grande, polo veto do PP. Como non imos ser competentes para investigar o maior accidente ferroviario da nosa historia?, interpelaba.
A formación nacionalistas insiste en reclamar a dimisión da ministra de Fomento, Ana Pastor, máxime tras coñecer o informe da UE no que se establece claramente que o seu departamento lonxe de colaborar, torpedeou a investigación das causas do sinistro de Angrois, está inhabilitada desde o punto de vista moral e ético para seguir á fronte do ministerio, e non pode mirar para outro lado. Se o PP pensa que nos imos render ante o rodillo da maioría absoluta, equivócase, concluíu.
