O BNG preguntou ao Ministerio de Transportes a respecto dunha acta de Inspección de Traballo na que se instaba á entidade pública, ENAIRE, a que dera cumprimento aos dereitos lingüísticos dos seus traballadores e traballadoras e permitira as comunicacións en galego. En resposta a esta pregunta escrita, o Ministerio comunicou que ENAIRE ten recorrido o expediente aberto por Inspección de Traballo, o que manifesta a vontade de non respectar os dereitos lingüísticos dos seus traballadores e traballadoras por parte da empresa.
O BNG considera escandaloso que ENAIRE, unha empresa pública que debera ser exemplo do cumprimento da legalidade vixente, non garanta que as comunicacións que realizan os traballadores e traballadoras desde os centros empresariais situados na Galiza podan realizarse en galego.
O pasado mes de xullo, o deputado Néstor Rego denunciou no Congreso a campaña de acoso e persecución cara as e os representantes dos traballadores do centro de ENAIRE en Santiago de Compostela e dentro da cal se encadra a súa negativa a tramitar as solicitudes e comunicacións realizadas por estes en lingua galega. “Esta actitude por parte da empresa pública é inaceptábel, pois atenta contra os dereitos lingüísticos e contra a liberdade sindical, por entorpecer a acción sindical nesta compañía pública” salientou o deputado nacionalista.
O BNG reclama ao Ministerio de Transportes, Mobilidade e Axenda Urbana a investigar a campaña de acoso por parte de ENAIRE cara os traballadores e traballadoras por empregar a lingua galega, así como instar á empresa pública a cesar nas súas accións ilícitas e a dar cumprimento á acta de resolución.
