- O nacionalista acusou ao vicepresidente da Xutna de apoiar operacións de “descrédito” contra o BNG na Deputación de Pontevedra e persistir “nunha estratexia de confrontación” contra as administracións locais
Tras a comparecencia do vicepresidente, Alfonso Rueda, para anunciar as liñas de actuación do seu departamento, o deputado do BNG, Luís Bará criticou “o continuísmo” do titular da vicepresidencia da Xunta como confirman, dixo, os feitos da pasada lexislatura e aventurou que na actual, “nada apunta ao optimismo”.
Sobre a administración de Xustiza, o deputado do BNG lembrou que un gran número de xulgados seguen “colapsados” por carencia de medios, sobre todo, no proceso de dixitalización, como levan denunciado sindicatos e profesionais da Xustiza. Ademais, fixo fincapé nos problemas derivados do uso do galego, “moito adianto tecnolóxico pero cada vez temos máis dificultades para utilizar a nosa lingua na administración de xustiza”.
O nacionalista cualificou de “fracaso estrepitoso” as políticas de igualdade e loita contra a violencia machista. Nestes sentido, reiterou a necesidade “dun pacto” a nivel estatal e galego para combater con máis medios e vontade política esta “gravísima situación”.
Dr.Yekill pola mañá e Mr.Hayde pola tarde
O deputado acusou ao vicepresidente de ser pola mañá, Dr.Yekill exercendo de vicepresidente da Xunta e pola tarde, Mr.Hayde como “xefe provincial do movemento popular da provincia de Pontevedra” demostrando a incapacidade para chegar a acordos coa Deputación e instalados “nunha estratexia de confrontación” porque non asumen o cambio político desta institución. Por outra parte, tamén afirmou que Rueda non está interesado en mudar certas actitudes e campañas contra os deputados e deputadas que traballan diariamente para cambiar vellas “políticas de prebendas e privilexios” establecidas polo Partido popular en anteriores gobernos.
A respecto do papel de Rafael Louzán, Luís Bará preguntou cal é a súa situación como militante do Partido popular, e cal a “situación laboral na Deputación de Pontevedra”. Ademais mostrou o seu interese por coñecer qué traballos está a facer para cobrar “43.935 euros” desta institución. “Terá algo que ver que vostede, no seu momento fora asesor de Louzán cando ostentaba o cargo de Presidente da Deputación de Pontevedra”?, apostilou.
Na súa intervención, o nacionalista criticou a permanente confrontación do Partido popular coas cidades e puxo como exemplos a Área Metropolitana de Vigo ou Pontevedra, concello no que está a apoiar a ENCE-Elnosa favorecendo os intereses das empresas fronte aos dos veciños e veciñas desta cidade. Vostedes, recalcou o parlamentario, “están instalados nunha estratexia pre-electoral da campaña municipal de 2019”
Finalmente, Bará apelou ao dialogo para acadar unha maior cooperación entre a consellería de Presidencia, Administracións públicas e Xustiza coas administracións locais
