- A portavoz nacionalista, Ana Pontón e a deputada e portavoz de enerxía, Noa Presas mantiveron hoxe unha xuntanza cos promotores da Iniciativa Lexislativa Popular contra a pobreza enerxética e a favor de implantar a tarifa eléctrica galega
O grupo parlamentario do BNG mantivo hoxe unha xuntanza cos promotores da Iniciativa Lexislativa popular contra a pobreza enerxética e a favor de implantar a tarifa eléctrica galega. As deputadas do BNG e os promotores da ILP coincidiron en establecer accións ante “o secuestro que está a facer o Partido popular dunha lei ” aprobada, hai máis dun ano, no Parlamento galego.
Noa Presas afirmou que non existe ningún motivo para seguir demorando a tramitación da lei que ademais contrasta “coa celeridade” do Partido popular á hora de axilizar outros textos lexislativos como a recente lei de acompañamento aos Orzamentos co fin de introducir diversas modificacións non sometidas a debate parlamentar . Tanto para o BNG como para o grupo promotor da ILP é urxente iniciar os trámites da ILP, e non permitiremos,dixo a deputada Noa Presas, que persista “o silencio” dunha iniciativa que contou cun grande aval social.
Ante os medios de comunicación, a deputada anunciou que nas próximas semanas, o grupo parlamentario do BNG promoverá que sexa iniciado “o procedemento ordinario para tramitar a lei” e instaremos ao goberno galego a que “no prazo de tres meses a lei poda ser aprobada no Parlamento galego”. Presas explicou que o mes de marzo é suficiente para as comparecencias de expertos e expertas na materia, o mes de abril para rematar os traballos e prazo de emendas e no mes de maio, sería posible que “ todos os grupos parlamentarios podamos aprobar a lei”
Na súa intervención, a deputada volveu reiterar as denuncias sobre o tiquet eléctrico do que dixo foi destinado a outras partida e só representou, “unha nova manobra de propaganda do Partido popular”.
Autogoberno real para Galiza
A nacionalista tamén se referiu ao anuncio do Presidente da Xunta á consecuencia das declaracións do ministro de Facenda, Cristobal Montoro quen afirmou que a convocatoria de prazas públicas para profesores e profesoras en Galiza depende do pacto entre o PP e PSOE no Estado cara a aprobación dos Orzamentos xerais. Para a deputada, o Partido popular galego demostra ser “subsidiario do ditado do Goberno central e estar supeditado aos intereses dun goberno en minoría do Estado e non do que necesita Galiza”. Condicionar as contratacións do SERGAS e do Ensino público aos orzamentos de Madrid é unha mostra máis da “pouca capacidade que temos para decidir sobre os servizos básicos que ademais temos que financiar nós”.
Dende o BNG, engadiu a nacinalista, seguimos apostando por outro modelo de financiamento, “un concerto económico que nos permita contar con máis recursos para xestionar as nosas competencias galegas sen depender do que lle conveña ao Sr. Rajoy no goberno de Madrid”.
Con outro modelo de financiamento, recalcou teriamos capacidade para xestionar o cen por cen dos nosos recursos e decidir canto persoal precisamos na Sanidade pública e no Ensino e criticou a “estratexia publicitaria do goberno de Feijóo, plenamente consciente dunha convocatoria que sería decida en Madrid e que agora xustifica por presións do Estado para que PP e PSOE acaden un novo pacto de orzamentos no que Galiza non teña nin peso político nin voz”, concluíu