A cabeza de lista do BNG, Noa Presas, comprométese a exixir do Goberno do Estado a creación dun xulgado específico de violencia machista en Ourense que inclúa a o tratamento dos delitos sexuais. A organización nacionalista propón maior formación obrigatoria para todos os axentes e organismos implicados, así como modificacións legais para a loita contra a violencia machista no ámbito dixital e aumentar os recursos para loitar contra este tipo de violencias. Así mesmo, Presas presenta o BNG como o muro de contención daquelas forzas políticas que “se atreven a negar a existencia e a gravidade da violencia machista” e chama a confiar na organización nacionalista o vindeiro 23X como o voto “verdadeiramente feminista” en Ourense.
“Este 23 de xullo é fundamental para as feministas, sendo necesario que avancemos nas políticas de igualdade e avanzar, tamén, contra a violencia machista” reivindica a cabeza de lista do BNG por Ourense. Neste sentido, explica que nun contexto “onde hai forzas políticas que se atreven a negar a existencia e a gravidade da violencia machista é máis necesario que nunca apostar por forzas feministas”.
No caso do BNG, unha forza con obediencia no País, preséntanse a estas eleccións co obxectivo de condicionar a política do Estado para que cumpra con Galiza e con Ourense, tamén en materia de igualdade e a prol da loita contra a violencia machista. Neste sentido, lembra o incumprimento do actual Goberno xa que, segundo lembra Presas, no Acordo de Investidura incorporouse a creación dun xulgado específico de violencia machista en Ourense “e non se cumpriu”.
“Temos máis de 400 mulleres nas comarcas de Ourense que están protexidas contra a violencia machista. Precisamos ampliar os recursos: un xulgado específico, obrigatoriedade de formación en toda a cadea que atende a estas mulleres e mesmo máis recursos para que as comunidades poidan ter maior atención e protección” enumera Presas.
Neste caso, a organización nacionalista demanda impulsar medidas concretas e específicas dirixidas á formación obrigatoria de todos os axentes, organismos e institucións implicados –de maneira directa ou indirecta- coa prevención e intervención fronte á violencia machista, a comezar polas forzas e corpos de seguridade e a xustiza.
Así mesmo, tamén exixirán o impulso de mudanzas legais para combater calquera forma de violencia machista no ámbito dixital e garantir a debida persecución destes delitos cando se cometan a través da rede ou polo uso de tecnoloxías e plataformas dixitais, incluíndo a Intelixencia Artificial.
