O PP veta a comparecencia de Feijóo para dar conta da xestión da vaga de lumes
Ana Pontón demandou ao inicio do pleno unha alteración da orde do día para incluír a comparecencia do presidente da Xunta
A portavoz nacional, Ana Pontón, demandou ao inicio do pleno unha alteración da orde do día para incluír a comparecencia do presidente da Xunta en relación á situación de emerxencia nacional provocada pola vaga de lumes dos últimos días. A demanda, formulada polo BNG e polas outras dúas forzas políticas da oposición En Marea e PSdeG, foi vetada polo PP.
Pontón salientou que o xefe do Executivo debe “dar a cara” ante o Parlamento e informar da situación xerada polos lumes, das medidas adoptadas para enfrontar as lapas e das actuacións previstas para xestionar todos os efectos causados polos incendios, ademais de servir para dar pé a un debate de fondo para mudar a actual política forestal e de abandono do rural que ten convertido Galiza nun polvorín.
Ao mesmo tempo, e a través dunha iniciativa na Eurocámara, o Bloque trasladou a Comisión Europea a situación provocada pola vaga de incendios e demanda do Executivo comunitario medidas extraordinarias e urxentes de apoio a Galiza, así como activar o Mecanismo Europeo de Protección Civil para responder ás necesidades inmediatas desta catástrofe. Ademais, pide ao Executivo comunitario que esixa ao Goberno español o cumprimento da normativa de prevención e extinción de incendios.
A portavoz en Bruxelas, Ana Miranda, xa iniciou os contactos ante os comisarios de Medio Ambiente e de Agricultura para que tomen cartas neste asunto, denunciando que a Xunta “desactivou” o dispositivo da loita contra os lumes ademais de precarizar o servizo.
“A falta de prevención pública, as actuais condiciones meteorolóxicas, o abandono do rural e a eucaliptización do territorio son causas desta traxedia que ten provocado mesmo vítimas mortais”, indica a portavoz en Bruxelas, Ana Miranda, na iniciativa, onde tamén salienta a actitude exemplar da cidadanía galega “que coa súa valentía e coas súas propias mans supliu a falta de medios” na loita contra os lumes.