O PP non quere que o goberno da Xunta elabore un inventario dos bens espoliados pola familia Franco

O deputado do BNG, Luís Bará defendeu hoxe, a través dunha proposición non de lei,  encargar a unha comisión independente un informe amplo e exhaustivo sobre todos os bens que puideron pasar a formar parte do patrimonio dos Franco de “maneira irregular ou ilícita”. Neste estudo débense analizar as vías para a recuperación dos bens espoliados, prestando o asesoramento necesario ás entidades públicas e privadas e ás persoas que desexen emprender accións legais para a restitución dos citados bens.

Ademais, reclamou elaborar un inventario de propiedades mobles e inmobles espoliadas no que figure a súa procedencia, a propiedade orixinal, o método de adquisición ou apropiación, os valores históricos, artísticos e culturais, o valor económico estimado, a situación actual e as entidades ou persoas lexitimadas para a súa recuperación, ao que sumou  unha avaliación dos beneficios obtidos pola familia Franco como consecuencia da venda daqueles bens que foron adquiridos de “maneira ilícita ou fraudulenta.”

A iniciativa do BNG foi rexeitada polo grupo maioritario do Partido popular suscitando un bronco debate entre o parlamentario do BNG e o portavoz popular, Alberto Pazos Couñago.

A sociedade, afirmou Bará quere “saber a verdade e facer xustiza” pero vostedes queren tapalo e non o van a conseguir. Hai que facer unha política de Memoria histórica, esa memoria que o Partido popular quixo demoler e botar abaixo durante catro anos. “Son vostedes combatentes do bando do esquecemento” e “cómplices do espolio”.

Tras a intervención do nacionalista, o portavoz popular, Pazos Couñago trasladou  unha queixa ao presidente da mesa da comisión pedindo a  retirada dalgúns termos utilizados por Luís Bará que non aceptou a petición e se   negou a retirar as súas  palabras.