Luís Bará cualifica de “pelotazo anunciado” o proxecto deportivo e comercial de Mos e pide a súa retirada

Luís Bará
Luís Bará

Culpa de “cacicada” modificar o Plan Urbanístico do concello de Mos para beneficiar ao Celta de Vigo e promotores privados que “arrasarán terreos” para construír o proxecto deportivo e un gran centro comercial

O deputado do BNG por Pontevedra, Luís Bará cualificou hoxe de “pelotazo anunciado e cacicada” a modificación do Plan urbanístico de Mos para construír o proxecto deportivo e un gran centro comercial nas parroquias de Tameiga e Pereiras co fin de beneficiar a promotores privados.

Bará reiterou a súa denuncia de  “pelotazo urbanístico” amparado na  modificación dunha modificación dun artigo da Lei do Solo co único obxectivo de conceder a empresas privadas a capacidade de expropiar terreos para construír un complexo deportivo unido a o gran centro comercial.

Para o deputado, a Cidade Deportiva do Celta é a tapadeira que disfraza a construción do macrocentro comercial na Área de Vigo e que ocupará 142.000 metros cadrados de extensión e 120.000 metros cadrados de edificabilidade. “Non vemos por ningún lado interese público neste proxecto promovido por unha entidade privada como é o Celta de Vigo, que no futuro pode ser de capital catarí o chinés”, alegou.

“Ese capital estranxeiro especulativo que leva tempo tentando facer unha operación en Vigo e área de influencia está  disfrazado de utilidade pública, pero non se trata dun hospital, un instituto, depuradora ou parque empresarial. A declaración pública é o que abre paso a capacidade de expropiación”, argumentou.

No debate da proposición non de lei, o nacionalista  reclamaba retirar a proposta de modificación da lei de Solo e como consecuencia, a modificación do Plan urbanístico de Mos, ademais dunha moratoria nas autorizacións de macrocentros comerciais para defender o futuro do pequeno comercio ameazado polas grandes superficies comerciais.

GRAN RESPOSTA SOCIAL CONTRA O PROXECTO

Na réplica ao portavoz do Partido popular,  Alberto Pazos Couñago que defendeu o proxecto e as  expropiacións,  Luís Bará  afirmou que hai unha grande resposta social contra a construción do proxecto deportivo e comercial. Neste sentido, recalcou que    veciñanza de Tameiga é contraria como evidenciou a asemblea de comuneiros na que de  253 membros , “247 dixeron non”. Ademais, a esta negativa da veciñanza  sumou o informe de calidade ambiental apoiado en estudos da dirección do territorio, de urbanismo, Confederación Hidrográfica, dirección Xeral de patrimonio e do  concello de Vigo, que tildou de  “demoledor” nas súas conclusión. As expropiacións, polo tanto  “non están xustificadas” e se o que queren  facer é unha cidade deportiva, existen terreos no concello de Vigo para construíla, manifestou.

Por outra parte considerou que as grandes superficies comerciais provocan un “impacto brutal” contra o tecido comercial e comercio local  urbano. Si había razóns para paralizar “o despropósito” do campo de golf de Baiona, no caso que nos ocupa, “hai cen veces máis e non o vai consentir nin a xente de Tameiga nin o pequeno comercio de toda a contorna” porque non queren esta “barbaridade” no monte de Tameiga e Pereiras en Mos.

Os votos en contra  do Partido popular impediron que prosperaran as reclamacións da iniciativa do BNG defendida polo deputado, Luís Bará. 

 
 
Afíliate, faite do bloque
Anímate a dar o paso, súmate ao proxecto do BNG