BNG reclama ao Goberno actuar para evitar a redución dos horarios de caixa nas entidades financeiras

Néstor Rego
Néstor Rego

Néstor Rego denuncia a limitación dos dereitos das persoas usuarias e a concertación ilegal de horarios por parte das entidades asociadas a AEB e a CECA

O BNG reclama ao Goberno impulsar as modificacións lexislativas precisas para garantir o acceso en condicións adecuadas aos servizos bancarios por parte de toda a poboación

O deputado do BNG no Congreso, rexistra iniciativas para denunciar a redución de horarios de atención ao público en diferentes entidades financeiras. Rego reclama ao Goberno do Estado que tome medidas para solucionar o que pode supor unha violación da normativa sobre a liberdade de competencia e que as persoas usuarias recuperen o dereito a ter uns horarios de atención adecuados para acceder a servizos financeiros básicos.

Nos meses anteriores á declaración das restricións para a loita contra a pandemia, varias entidades financeiras, asociadas de AEB (Asociación Española de Banca) e CECA (Confederación Española de Caixas e Aforros), comunicaron o fechamento dos servizos de caixa das oficinas a partir das 11 da mañá. O servizo, até ese momento, prestábase até as dúas ou dúas e cuarto, dependendo da entidade. 

Con esta decisión, motivada por criterios de rendibilidade económica, as entidades están prexudicando de maneira importante os usuarios e usuarias. “A redución de horarios afecta especialmente a aqueles colectivos vulnerábeis que, pola súa idade ou pola súa dificultade de acceso ás novas tecnoloxías, dependen da atención presencial personalizada”, sinala Néstor Rego.

O deputado nacionalista salienta que non existen motivacións de tipo laboral que impliquen unha necesidade de axustar o horario e “tampouco pode alegarse como xustificación unha redución da demanda deste tipo de servizos; de facto agora é habitual ver filas de persoas na rúa diante das entidades bancarias esperando para seren atendidas”.

Rego subliña que o feito de que diferentes entidades financeira, de maneira paralela e coincidente no tempo, estabelecesen unha redución dos horarios de caixa, indica que se trata dunha acción concertada, o que claramente é ilegal e debe ser investigado polas autoridades competentes, particularmente a Comisión nacional do Mercado e da Competencia (CNMC). “Unha práctica claramente abusiva frente aos dereitos das persoas usuarias, que pode supor unha violación da normativa sobre a liberdade de competencia e que debe ser rectificada” afirma Rego.

Ademais, o deputado do BNG denuncia que nin sequera as entidades cumpriron coas obrigas legais canto á modificación das condicións de prestación do servizo. “Trátase dun servizo bancario básico, polo que as entidades financeiras teñen a obriga de comunicar con carácter individual e con dous meses de antelación a restrición do servizo, mais procederon a reducir os horarios sen realizar dita comunicación”.

O BNG reclama ao Goberno impulsar as modificacións normativas e lexislativas precisas para garantir o acceso en condicións adecuadas aos servizos bancarios por parte de toda a poboación, algo que na actualidade se está a ver dificultado pola restrición da atención presencial e polo fechamento de oficinas, especialmente no ámbito rural.

Afíliate, faite do bloque
Anímate a dar o paso, súmate ao proxecto do BNG