O BNG pide implantar un paquete de medidas que impulsen o emprego das mulleres
Carme Adán reclamou unha axuda equiparábel ao salario mínimo para as desempregadas maiores de 50 anos cunha vida laboral de 30 que xa esgotaron as prestacións
Ante a celebración do 8 de marzo, Día Internacional da mulleres, as deputadas do BNG, Carme Adán, Ana Pontón e Tereixa Paz compareceron ante os medios de comunicación para presentar un plan de medidas urxentes destinadas potenciar o emprego feminino.
Carme Adán, portavoz de Igualdade lembrou que este ano o BNG conmemora o 8 de Marzo, Día Internacional das mulleres co lema A forza do Feminismo como homenaxe á realidade das mulleres galegas mozas, maiores e de todas as idades que están na emigración ou desempregadas. Os datos sobre a situación laboral das mulleres galegas, dixo, son alarmantes e van empeorando coa emigracións das mulleres mozas , dende o ano 2008, máis de 70.000 mozas abandonaron Galiza.
Por outra parte, afirmou, as mulleres galegas cada vez son máis pobres cunha fenda salarial que aumentou case catro puntos, situando a hora de traballo das mulleres moi por debaixo da dos homes.
Mulleres de 45 a 50 anos ausentes no mercado laboral e sen prestacións
A parlamentaria explicou que moitas mulleres víronse obrigadas a abandonar o seu traballo para atender a fillos ou familiares e ao chegar os 50 anos, o desemprego aumenta así como a franxa das mulleres autónomas nun 12%. Isto evidencia que tras unha vida laboral de 30 ou 35 anos, aos 50 son despedidas ou deben pechar os seus negocios. Unha opción viable para este colectivo non é a emigración polo que deben enfrontarse a 10 o 15 anos sen ningún tipo de prestación.
Para estes casos, dende o BNG propoñemos crear unha axuda para desempregadas cunha contía igual ao Salario Mínimo Interprofesional e con carácter indefinido.
Plan de emprego feminino dependente da Consellería de Economía e Industria
Asemade, tamén propoñemos un plan de emprego feminino como contempla a Lei galega destacando: o acento nas mulleres maiores, e unha liña de axudas para empresas femininas.
Estas medidas, explicou, deben depender do IGAPE ou de calquera dos chiringos que ten montados a Xunta pero dentro da Consellería de Economía e Industria para que o Goberno galego tome en serio a situación da perda de 1.900 postos femininos no ámbito industrial, e o peche definitivo de moitas empresas femininas.
Axuda na redución de xornada e excedencias por maternidade e coidado de fillos e fillas, creación dun grupo de traballo sobre a fenda salarial para igualdade entre homes e mulleres, impulsar a rede pública de servizos sociais e públicos e medidas que favorezan a integración da muller no mercado laboral foron algunhas das reivindicación formuladas pola nacionalista ás que engadiu a petición ao Goberno do Estado para ampliar a 6 meses os permisos de paternidade e maternidade, unha bonificación total das traballadoras que substitúan a outras por abandono do emprego e compensación para aqueles profesionais que interrompan o seu traballo motivado por coidados.
Adán concluíu reclamando que o Goberno galego deixe a residualidade das celebracións e atalle definitivamente o problema laboral das mulleres galegas.