CONGRESO

BNG exixe unha solución para as pensións dos mariñeiros galegos que traballaron en Noruega

Encontro Long Hope
Encontro Long Hope

Os nacionalistas instaron o Goberno español a retomar as relacións diplomáticas con Noruega para dar solución aos mariñeiros que non perciben ningún tipo de pensión a pesar de teren traballado en buques noruegueses e ter pagado alí os correspondentes impostos.

Néstor Rego criticou que, desde a súa constitución formal, o Goberno español non mantivese ningún encontro coa asociación Long Hope para dar conta das actuacións diplomáticas co país nórdico.

BNG exixe unha solución para as pensións dos mariñeiros galegos que traballaron en Noruega

O BNG instou o Goberno español a retomar as relacións diplomáticas con Noruega para dar solución á inxusta e dramática situación en que se encontran aquelas persoas (na súa gran maioría galegas) que non perciben ningún tipo de pensión do sistema de seguridade social do país nórdico, a pesar de ter traballado moitos anos en buques noruegueses e ter pagado alí os correspondentes impostos.

A asociación Long Hope, constituída para defender os dereitos dos traballadores e traballadoras que prestaron servizos nestes buques noruegueses antes de 1994, reuníronse a semana pasada co deputado do BNG no Congreso, Néstor Rego, para trasladar a drástica situación pola que están a pasar nestes momentos os mariñeiros afectados e as súas familias.

Rego rexistrou no Congreso unha iniciativa para instar o Goberno español a retomaren as relacións con Noruega e criticou que, desde a súa constitución formal, non mantivera ningún encontro coa asociación Long Hope para dar conta das actuacións diplomáticas con Noruega e intentar resolver extraxudicialmente as graves consecuencias derivadas da falta de protección daquelas persoas que sufriron unha exclusión do sistema de seguridade social deste país.

Neste sentido, o deputado nacionalista aproveitou para  solicitar á Ministra de Exteriores que aproveite a sesión de Delegadas e Delegados de Ministras e Ministros do Consello de Europa que se vai a realizar mañá 29 setembro e pasadomañá 1 de outubro de 2020, para reunirse co seu homólogo noruegués e buscar unha solución á inxustiza social que comete Noruega cos mariñeiros galegos.

 

BNG exixe unha solución para as pensións dos mariñeiros galegos que traballaron en Noruega