O Bloque Nacionalista Galego rexistra a solicitude de comparecencia do Ministro de Agricultura, Pesca e Alimentación no Congreso para que explique a posición do Goberno do Estado ante a intención da Comisión Europea de pechar á actividade pesqueira un total de 94 caladoiros –do Golfo de Cádiz até a zona norte do Gran Sol- que tería un impacto moi negativo para a frota pesqueira. O deputado do BNG na cámara baixa, Néstor Rego, comprométese, ante o malestar do sector pesqueiro e agora que se retoma a actividade política e a decisión segue no aire, a traballar para que o executivo estatal non apoie esta medida que precisa ser adoptada por unanimidade.
A intención da Comisión Europea de pechar para a actividade pesqueira un total de noventa e catro caladoiros está a producir malestar e preocupación entre o sector pesqueiro. As áreas afectadas van desde o Golfo de Cádiz até a zona norte do Gran Sol, concretamente até o oeste de Escocia. De facto, de levar a efecto esta medida, afectará aos buques que teñen contacto co fondo como son os buques de arrastre e de palangre. Para estes últimos tería un impacto especialmente negativo posto que veranse afectados diminuíndo 75% as súas capturas.
“Estamos a falar dunha decisión que afecta moi negativamente ao conxunto da frota pesqueira do Estado español e, especialmente, para a galega” explica o deputado do BNG. Rego lembra que esta medida foi impulsada pola Comisión Europea de Medio Ambiente, Océanos e Pesca no Marco da Estratexia de Biodiversidade e do Green Deal baixo o argumento de “protexer hábitats sensíbeis”.
Para o deputado do BNG “é indiscutíbel a necesidade de protexer os ecosistemas mariños e as biomasas de peixes” mais “debe acompasarse co impacto socioeconómico en sectores como o pesqueiro”. Esta decisión, segundo sinala Néstor Rego, debe ser adoptada pola unanimidade dos estados membros polo que reclama ao Goberno do Estado que defenda os intereses do sector pesqueiro e vote en contra desta medida.
“Solicitamos a comparecencia no Congreso do Ministro de Agricultura, Pesca e Alimentación para que explique a posición actual do Goberno do Estado que manterá nos órganos de decisión da Unión Europea. A decisión está no aire” destaca Rego. Neste sentido, a frente nacionalista entende que, ao ser unha medida de calado, a Comisión Europea debería empregar o diálogo, a información e a transparencia, contando incluso “con informes e estudos serios e rigorosos que detecten as zonas verdadeiramente vulnerábeis e sensíbeis a pechar”.
Diálogo, incide Rego, tamén co sector pesqueiro –por parte da Comisión Europea e o Ministerio do Goberno do Estado- a través de reunións, que aínda non se tiveron, para coñecer a súa posición ao respecto desta medida. “É preciso levar a cabo estudos de impacto socioeconómico nos distintos sectores pesqueiros para coñecer como afectará esta medida e se todas as áreas propostas deben pecharse” salienta o deputado do BNG.
