BNG denuncia a “merma inxustificable” de especialistas en pedagoxía terapéutica no CPI Marqués do Pazo da Mercé
Cristina Fernández Davila alerta de que unha nena con necesidades específicas leva seis meses sen a atención individualizada que precisa, mentres a Consellería de Educación “non dá resposta” e deixa os centros “desbordados
O BNG denuncia que as probas de diagnóstico “non fan máis que aumentar o traballo do profesorado” sen repercutir nunha mellora educativa
A deputada do Bloque Nacionalista Galego, Cristina Fernández Davila, denunciou na Comisión de Educación a situación crítica que atravesan moitos centros educativos galegos, facendo especial fincapé no CPI Marqués do Pazo da Mercé, nas Neves. A parlamentaria nacionalista denunciou que, a pesar de que o centro solicitou a principios de curso a substitución dunha praza de pedagoxía terapéutica vacante, a Dirección Territorial “non autorizou esta incorporación” e levan “seis meses de curso” cunha “merma importante” de efectivos.
“O curso pasado tiñan dúas prazas; este curso, cun PT preferente e o PT con praza estable, quedan só co preferente. É unha redución do 50% dos efectivos. Hai alumnado con diversidade que está quedando sen atender”, explicou Davila, quen puxo o exemplo dunha nena que, grazas á implicación do profesorado e da súa familia, recibe material para reforzar na casa, unha situación que cualificou como “nin é o idóneo nin é o normal”.
A deputada nacionalista criticou duramente a resposta da administración ante esta carencia: “O que lles dixeron é que se apañaran como puidesen co PT preferente”. Neste senso, subliñou que a falta de especialistas supón un “marrón importante” para a dirección dos centros, que ten que “dar a cara ás familias”, e provoca que sexa o propio profesorado quen teña que decidir “a que alumnado atende e a cal non”, ou ben “repartir as horas” cunha consecuente perda de calidade na atención.
Davila equiparou esta situación coa sanidade pública para demandar especialistas formados: “Un alumno con TEA, con TDAH ou con outras necesidades específicas necesita un especialista que os entenda, que os comprenda e que saiba os protocolos. Iso sería unha educación integradora e igualitaria, que non existe por moito que vostedes digan que si”.
Noutra orde, a parlamentaria do BNG vinculou esta falta de recursos coa publicación da resolución das probas de diagnóstico para o curso 2025-26. Denunciou que, lonxe de servir como ferramenta para mellorar a calidade e a equidade, como establece a lei, estas probas “non están a derivar nunha mellora educativa” nin nun reforzo de medidas como máis especialistas ou a redución de ratios. Pola contra, afirmou que supoñen “un aumento de traballo para o persoal docente” que “non só non facilita os recursos que se precisan, senón que provoca un problema e un maior incremento de tarefas e funcións”.
Finalmente, advertiu de que a falta de atención personalizada en idades crave deriva en “problemas emocionais e de conduta” para o alumnado, e xera unha situación de “desbordamento” para as familias, o profesorado e as direccións dos centros en todo o país.