BNG pide explicacións a Rueda por non limpar as faixas secundarias nos concellos de menos de 10.000 habitantes

A deputada do Bloque Nacionalista Galego, Montse Valcárcel, denunciou hoxe o “incumprimento inaceptable” do presidente da Xunta, Alfonso Rueda, que prometera en setembro de 2025 completar a limpeza das faixas secundarias de todos os concellos de menos de 10.000 habitantes antes do 31 de maio de 2026. “Ese prazo pasou e o compromiso non se cumpriu”, afirmou Valcárcel, quen rexistrou un paquete de iniciativas parlamentarias para exixir explicacións e un calendario real.

“En setembro de 2025, tras un verán devastador que deixou case 120.000 hectáreas arrasadas, Rueda prometeu algo concreto e verificable. Puxo 25 millóns de euros sobre a mesa, asináronse convenios, fixouse un prazo. Ese prazo pasou, e o compromiso non se cumpriu”, sinalou a deputada.

Valcárcel detallou que “hoxe hai plans municipais remitidos en marzo que seguen sen executar. Hai parcelas cuxa limpeza xa foi pagada nas que non se fixo ningún corte. Hai concellos que denuncian que non chegaron medios nin brigadas”.

A representante do BNG puxo o foco na gravidade dos feitos: “En Valdeorras, en Oímbra, no Ribeiro, o lume do ano pasado queimou terreos que xa foran aboados para limpar. Iso non é un fallo técnico. É un incumprimento presidencial que pon en risco vidas e bens nos concellos máis pequenos de Galiza”.

Por iso, o BNG rexistrou unha interpelación ao presidente, dúas proposicións non de lei e tres preguntas parlamentarias para que a Xunta dea conta dos calendarios concretos, concello por concello, dos quilómetros executados, as brigadas mobilizadas e a porcentaxe de avance. “Ana Pontón preguntaralle directamente a Rueda no Pleno do Parlamento e exiximos un calendario real, concello por concello, antes de que chegue outro verán seco”, concluíu Valcárcel.