BNG adianta o seu non rotundo ao teito de gasto do Goberno de Rueda porque suporá novos recortes nos servizos públicos

A deputada e portavoz de Facenda do BNG no Parlamento, Noa Presas,A deputada e portavoz de Facenda do BNG no Parlamento, Noa Presas, anticipou hoxe o “non rotundo” da formación nacionalista ao proxecto de teito de gasto presentado polo Goberno de Rueda, que se será debatido mañá en Pleno. Un proxecto que, asegura, non é “nin ambicioso, nin histórico nin expansivo”  senón que, pola contra, é unha "mala noticia" que traerá consigo novos recortes da prestación de servizos públicos no País.

Malia que o PP presume dun aumento no teito de gasto de 223 millóns de euros, explica, isto suporá só un 1,6 % máis, cando a inflación, o custo de vida, subiu un 2,7 % ao longo do pasado 2024. “Isto significa que hoxe prestar servizos é máis caro e, polo tanto, a Xunta vai ter menos recursos para facelo”, sostén.

A deputada nacionalista avanza, como outra das razóns do voto en contra do BNG, o uso que o PP fai do teito de gasto como “unha performance” ou “unha tapadeira para ocultar que a negociación importante que hai neste momento é loitar por un sistema de financiamento mellor para Galiza”.

Máis unha vez, criticou así a submisión e o servilismo de Rueda ás directrices que lle marca o PP de Madrid desde Génova, negándose a negociar de xeito bilateral co Estado a reforma do sistema actual de financiación que, subliña, supuxo para Galiza perdas de máis de 1.500 millóns ao ano, “máis do que gasta o PP en toda a política social”.

É por iso que o BNG volverá a defender no Pleno do teito de gasto a negociación dun modelo de concerto económico que lle devolva a Galiza a chave dos seus cartos, así como a posta en marcha de “medidas ambiciosas” nos próximos orzamentos da Xunta.

“Hai que ir a correccións básicas”, apuntou a portavoz de Facenda do BNG que, entre outras cuestións, propón destinar un 1% do orzamento da Xunta á loita contra a violencia machista, “para facernos eco das demandas do Consello de Contas e do feminismo”, ou “rescatar” a atención primaria destinando o 25 % dos presupostos, tal e como recomenda a Organización Mundial da Saúde (OMS).

Ademais, o BNG considera imprescindible a posta en marcha de novas medidas de apoio aos sectores económicos nun contexto de incerteza como o que vivimos actualmente, impulsando por exemplo un plan de choque ante as consecuencias que vai ter a política arancelaria dos Estados Unidos.

“No BNG dicimos non á proposta de teito de gasto do PP e si a propostas que melloren o orzamento futuro para o noso País, mellorando a vida da xente”, conclúe Presas.