BNG acusa o PP de querer converter a ría de Arousa nun “gran vertedoiro” e pide frear o depósito de lodos na zona de Sálvora

A voceira de Pesca do BNG no Parlamento, Rosana Pérez, emprazou o Goberno do PP a rexeitar a posibilidade de que as rías galegas, nomeadamente a ría de Arousa, sexan o punto de depósito de materiais de dragados. “Non poden botar outra lousa máis enriba da ría de Arousa”, asegurou a deputada, advertindo que o depósito de lodos constitúe unha ameaza máis —xunto a Altri e a reapertura da Mina de Touro— para unha ría que “hai xa tempo dixo basta e que o que necesita son medidas para a súa recuperación e non actuacións que a sigan convertendo no gran vertedoiro do País”.

Rosana Pérez, que defendeu unha proposición non de lei neste sentido, aludiu especificamente á proposta feita polo Centro de Estudos e Experimentación de Obras Públicas (Cedex), dependente dos ministerios de Transportes e de Transición Ecolóxica, para manter o punto E8, a 2 millas de Sálvora e a 3,7 de Ons, como alternativa prioritaria  para os depósitos da ría de Arousa.  No mesmo informe, establécese o punto D, ao sur das Rías Baixas, como o máis axeitado para as dragaxes que se executen na ría de Vigo, e no caso das de Pontevedra, como a do río Lérez, di que poden verterse indistintamente en calquera dos dous, explicou.

Criticou, neste punto, que á Xunta “non lle faltou tempo” para apoiar a proposta do Cedex, o que permitiría iniciar a tramitación ambiental e posterior licitación das obras da dragaxe do Lérez e das 16 paralizados desde Muros ata a ría de Pontevedra. Destacou, neste sentido, a necesidade de dragaxe do río Lérez — proxecto que o PP “mantivo trece anos no caixón”—  pero rexeitou que a Xunta queira “cargarlle o morto” á ría de Arousa, na que se prevén agora depositar os lodos e que xa está nunha situación de “debacle produtiva”. 

A deputada nacionalista instou así ao Goberno do PP a escoitar o sector pesqueiro da ría de Arousa, que rexeita os depósitos na zona E8 do mesmo xeito que rexeitou o sector en Pontevedra que se levasen máis de 221.000 Tn. de sedimentos ao oeste a illa de Tambo, na ría de Pontevedra, e nos bancos marisqueiros entre Campelo e Combarro, tal e como se prevía no anteproxecto para a dragaxe do Lérez publicado en 2017 e posteriormente modificado.

É por iso que a proposta do BNG é, tal como se recolle na iniciativa que defendeu Rosana Pérez e contra a que votou o PP, “rexeitar a posibilidade de que as rías galegas, nomeadamente a ría de Arousa, sexan o punto de depósito de materiais de dragados”. Unha reclamación que vai na liña do acordo aprobado polo Parlamento galego en xuño do 2019, na que se instaba á Xunta á “elaboración dunha proposta alternativa sustentable para o depósito dos lodos procedentes do dragado do río Lérez, de tal forma que garanta que estes non afectarán a ningunha das rías galegas, nomeadamente á ría de Arousa”, recalcou.

O BNG demanda tamén ao Goberno do Estado, como se recolle na iniciativa noutro dos seus puntos, que non autorice a zona de Sálvora como punto de vertido de dragados e que proceda á clausura do mesmo. Rosana Pérez lembrou, ao respecto, que esta zona serviu como punto de vertido de millóns de metros cúbicos de lodos e outros materiais entre 1988 e 2021.

A deputada nacionalista considerou imprescindible que se realicen estudos que certifiquen a potencial carga contaminante ou prexudicial dos lodos do río Lérez ou de calquera porto e, por outra banda, que especifiquen cal é a situación do punto E8, “se este depósito está a causar algún impacto xa na ría de Arousa, tanto ambiental como os recursos pesqueiros”, engadiu.