Ana Pontón lamenta que Rueda non teña vontade de chegar a acordos a favor de Galiza nos asuntos da súa competencia

A portavoz nacional, Ana Pontón, saíu do encontro lamentando que o presidente da Xunta non teña vontade de pactar solucionar nos asuntos da súa competencia, despois de que a reunión rematase sen que puxera sobre a mesa ningún punto de encontro sobre a axenda de temas remitida pola líder nacionalista: sanidade, escalada de prezos, coidado das persoas maiores e modelo eólico.

“Tras noventa minutos de reunión pregúntome para que convocou o señor Rueda este encontro senón tiña intención de traer á xuntanza ningunha proposta para fraguar un acordo sobre aqueles asuntos que son da súa competencia. Non sei se o presidente da Xunta quería unha foto, ten esa foto, pero non lle da ós galegos e ás galegas alternativas ós seus problemas”, destacou Pontón finalizada a reunión.

“Vemos un PP que cada día é máis pasado ante unha cidadanía que reclama unha alternativa sólida disposta a poñer solucións e enfrontar os retos de futuro e, por iso, vin con propostas concretas e realizables que só precisan vontade política para poñelas en marcha”, destacou, explicando as prioridades que abordou co xefe do Executivo.

Sanidade, cun plan de choque de 200 millóns de euros para sacar atención primaria do colapso, que permita contratar persoal e ampliar a carteira de serviz, tras trece anos de recortes que fan que, a día de hoxe, primaria teña menos orzamento que en 2009. Crise de prezos: aumentar o complemento autonómico das pensións non contributivas, -as máis baixas-, mellorar a RISGA e compatibilizala co IMV, aumentar as axudas directas para gastos básicos de vivenda ás persoas con menor nivel de renda. Igualmente, baixas as peaxes e subvencións directas ós sectores produtivos con máis impacto.

Os outros dous asuntos: coidado das persoas maiores e enerxía eólica. Pontón propuxo que as sete residencias proxectadas nas cidades sexan 100% de xestión pública, para avanzar nun modelo que garanta unha vellez digna. “Non hai nada que o impida se hai vontade política”, indicou. En relación ó modelo enerxético, a proposta do BNG pasa por reconducir o boom eólico especulativo cara un sistema eólico xusto no económico, social, ambiental e respectuoso co medio rural e coa xente do rural.

Converter a ciencia e a innovación en claves para un modelo económico de futuro ou a xestión directa do transporte ferroviario de proximidade foron outros temas que a líder do BNG levou ó encontro co presidente da Xunta.

“Lamentablemente, o señor Rueda non puxo sobre a mesa nada salvo xeneralidades de cara a unha reunión que ten solicitada ao presidente do Estado”, indicou, “o BNG sempre vai defender os intereses de Galiza goberne quen goberne en  Madrid, desde máis convocatorias MIR á descentralización dos fondos Next Generation, unha cuestión, por certo, na que nos quedamos soas no Parlamento”, recalcou.

Nesa defensa de Galiza sexa quen sexa o inquilino da Moncloa, Pontón citou a aposta do Bloque por máis competencias pero con ambición, -mesmo abrindo un debate sereno sobre un novo marco institucional para avanzar en poder político-, e pide a PP-PSOE que demostren a mesma vontade mantendo en Madrid as posicións que votan no Parlamento galego, “por iso lles pido que retiren as emendas contra a transferencia da AP9 aceptando o acordo aprobado por unanimidade na Cámara”.

Para a líder do Bloque, a posición de Rueda relela “un goberno sen impulso que está ante un fin de ciclo que ten ao BNG como alternativa desde a humildade pero con ambición de país, traballando coa man tendida para mellorar a vida das persoas”, alegou, “e non se logra cun goberno encastelado que non quere avanzar no que depende das súas competencias”.

Pontón insistiu en que, en todo caso, se o presidente da Xunta defende máis competencias para Galiza, o BNG vaino apoiar. “Se solicitar máis fondos para investir ou para acabar coas taxas de reposición vai ter o apoio do BNG porque fomos os primeiros en defender estes asuntos, cando gobernaba o PP en Madrid e agora que goberna o PSOE”, alegou, destacando que a formación nacionalista xa defende unha axenda galega en Madrid desde o minuto cero co acordo de investidura.

“Pero precisamos que cando o presidente da Xunta nos convoca propoña acordos no ámbito das súa competencias, onde está a vontade de diálogo nese campo, porque acordar no que afecta exclusivamente a outras administracións é moi doado”, alegou. Pontón destacou a cordialidade do encontro, pero lamentou que non se traducira en unha vontade de acordo por parte do xefe do Executivo no que depende da súa acción de goberno.