Ana Miranda defende na Eurocámara os dereitos dos pasaxeiros fronte ao abuso das aeroliñas

No debate do Parlamento Europeo denominado “Últimos avances na revisión dos Regulamentos sobre os dereitos dos pasaxeiros aéreos e sobre a responsabilidade das compañías aéreas”, a eurodeputada do BNG, Ana Miranda, defendeu os dereitos das pasaxeiras e dos pasaxeiros fronte ao lobby que exercen as aeroliñas e criticou que xa hai 10 anos que o Tribunal Europeo ditaminou que cobrar pola maleta de man é ilegal.

“Cantas veces nos chegaron a Comisión de Peticións deste Parlamento queixas dos pasaxeiros e as pasaxeiras por retrasos, por cobros de maletas, e por retrasos nas compensacións”, manifestou a eurodeputada galega na súa intervención, quen fixo referencia ás consideracións do eurodeputado Vicent Marzá, quen sinalou que o Consello chega a un acordo, pero non para protexer ou ampliar os dereitos dos pasaxeiros, senón para reducilos.

Ademais de poñer enriba da mesa que o Tribunal Europeo ditaminou hai xa 10 anos que o cobro pola maleta de man é ilegal e séguese cobrando, Ana Miranda tamén denunciou a pretensión dos Estados Membros da UE (Consello) de que os pasaxeiros e pasaxeiras teñan que sufrir un retraso de catro horas no seu voo para ter dereito a unha compensación, así como os retrasos habituais para cobrar esas compensacións.

Regulamento

“Agora que temos a oportunidade de acelerar as melloras para os consumidores, o Consello mete o freo ao Parlamento Europeo”, sinala a eurodeputada do Bloque, quen explica que a lexislación vixente prevé 250 euros aos pasaxeiros se o voo incorre nun atraso de 3 horas ou máis ao percorrer unha distancia de 1.500 quilómetros; 400 euros se o traxecto é de entre 1.500 e 3.500 quilómetros; e 600 euros para voos máis longos.

Porén, a proposta no novo regulamento contempla 4 horas para poder solicitar unha indemnización de 300 euros nos voos de ata 3.500 quilómetros e 500 euros naqueles que superen esa distancia e cheguen 6 horas tarde.

“Estes temas tocan a miles de persoas en Galiza, en toda Europa”, manifesta Ana Miranda quen critica que as compañías aéreas actúan con impunidade, “non só enganan á xente, senón que nos quitan voos, como pasa por exemplo en Galiza, e hai unha constante falta de información”.

Segundo subliña a eurodeputada do BNG, “non pode ser que dominen as decisións europeas as grandes aeroliñas e os seus consellos directivos e que non se teña en conta a voz de tantas pasaxeiras e pasaxeiros”, polo que expresa a súa total disposición a seguir defendendo nas institucións europeas os dereitos das persoas fronte aos abusos das compañías aéreas.