O PP impediu que prosperara a tramitación para a toma en consideración da Lei de Ordenación e xestión do litoral, defendida polo deputado nacionalista Luís Bará para reclamar a transferencia dos servizos e funcións da Administración Xeral do Estado a Galiza.
Na defensa da proposta, o nacionalista afirmou que “Galiza precisa gobernar o seu litoral e o seu mar” e criticou que o actual proxecto de lei do Partido popular, en tramitación no Parlamento galego, non vai na senda de acadar as competencias plenas da transferencia. Bará subliñou que o Partido popular “non reclamou ningunha transferencia en 14 anos” e agora, ao igual que os malos estudantes que ao final antes do exame, “o PP bota a andar un proxecto de lei, de maneira apresurada, que non responde aos intereses dos galegos e galegas, nin mellora a súa vida”.
Gobernan o noso litoral dende un despacho de Madrid e cunha visión centralista
Na súa intervención, explicou que a proposición de Lei Orgánica do traspaso das competencias dos servizos e xestión do litoral basease na “importancia de que Galiza conte coas máximas competencias nesta materia”, ao igual que outras comunidades como Andalucía, Cataluña, Canarias e Baleares. O noso mar, sentenciou Bará “non se pode gobernar dende un despacho de Madrid, a 600 Km de distancia e cunha visión centralista e enfoque mesetario”.
Por outra banda, dende o BNG defendemos esta proposta “ante a incapacidade da Xunta” para reclamar as competencias que lle corresponden e afeou que o PP “despois de 14 anos gobernando, non reclamara ningún traspaso”.
Asemade, a proposta está enmarcada nunha “axenda de impulso e autogoberno” para facer fronte a unha situación de emerxencia social, económica e medioambiental e desenvolver “todo o potencial que ten Galiza” ante estes grandes retos.
Fronte a concepción do Partido popular dun territorio “bonsai e liliputiense”, o BNG aposta por “unha Galiza en grande, viva, xusta e de futuro”, e nese sentido, vai a nosa proposta.
O PP négase a pedir a transferencia da xestión do litoral
Os votos en contra do PP impediron a toma en consideración da lei do BNG para reclamar ante o Estado a transferencia da ordenación e xestión do litoral. O portavoz, popular Alberto Pazos Couñago xustificou o veto do PP porque que xa hai unha lei do litoral en trámite no Parlamento galego ao que o nacionalista respondeu que a intervención do popular “foi unha sarta de disparates un tras outro” e tivo que clarificarlle a diferencia entre as competencias de ordenación do territorio e litoral recollidas no Estatuto e as competencias en materia de “xestión, servizos, funcións, edificios, expedientes, persoal, medios materiais, autorizacións de concesións”, competencias “non recollidas no Estatuto de Galiza” e que deben ser transferidas. Esa, recalcou Bará, é a intención da nosa proposta.
O PP, co seu veto, “oponse a que Galiza teña todas estas competencias” e o propio texto da lei do litoral tamén recolle a necesidade de reclamalas porque non vale só contar coas competencias de ordenación do litoral. Dende o BNG, insistiu o deputado pretendemos chegar “a un gran acordo de país” para dicirlle ao goberno central, sexa quen sexa a partir do 23 de xullo, que “todos os grupos deste parlamento apoian a transferencia dos medios e das xestións” pero, unha vez máis, o Partido popular vota en contra deste acordo.
Por outro lado, asegurou que o PP xa “non ten ningunha credibilidade” como constatan os feitos, en 14 anos non reclamaron unha soa competencia e lembrou que no ano 2009 o actual presidente, Alfonso Rueda, afirmou que “por culpa do bipartito, Galiza non ten policía autonómica nin competencias en tráfico porque só conseguiu 14 competencias” pero, o balance de Feijóo e de Rueda, retrucou Bará “foi cero competencias”. Vostedes, recalcou , “son os principais inimigos letais para o autogoberno” e teñen “un balance desastroso en materia de competencias”.
Nesta liña, recalcou que do ano 2009 ao 2023 o PP “vetou as transferencias” e quen pode presumir de impulsalas en materia de tráfico é o BNG aínda que logo tamén atopamos o “veto do PP en Madrid” ao igual que fixeron coa transferencia da AP-9.
O deputado nacionalista rematou a súa intervención lamentando o voto en contra do Partido popular do que dixo, manteñen un goberno “desorientado, paralizado en fuxida cara Madrid” e fronte esta parálise, “o BNG propón unha nova Galiza” e o desenvolvemento de todo o seu potencial porque somos un gran País e podemos chegar onde nos propoñamos pero precisamos “capacidade de decisión sobre o mar e a costa “ para xerar riqueza e mellorar a vida das galegas e galegos.
