O deputado do BNG, Francisco Jorquera tamén reclamou información sobre os resultados de ABANCA e o seu plan de mercar entidades fora do Estado español
O parlamentario do BNG, Francisco Jorquera, a través dunha proposición non de lei destinada a coñecer o custe real para o erario público da venda anticipada de Novagalicia Banco, afirmou que a desaparición do sistema financeiro galego produciu consecuencias ruinosas para Galiza e cualificou a operación doutro dos grandes fiascos que o Goberno de Feijóo deixará en herdanza.
Por outra parte, criticou que a piques de esgotar a lexislatura segue sen resolver o misterio da comisión de investigación das caixas, tendo en conta os novos datos sobre a evolución do aforro, o volume de depósitos dos bancos e o volume do crédito concedido, polo que instou á Xunta a demandar do Goberno do Estado a información necesaria para coñecer o custe real para o erario público da decisión de vender anticipadamente Novagalicia Banco.
A proposición non de lei defendida por Francisco Jorquera foi rexeitada polo grupo maioritario do Partido popular
Evolución do noso aforro
Na súa intervención, o nacionalista denunciou a expatriación do aforro galego e as dificultades de acceso ao crédito. Asemade lembrou que segundo os datos do Banco de España, o volume de depósitos dos Bancos en Galiza foron en Marzo de 2014: 56.601 M, no mesmo mes do 2015, 56.754 M e en decembro do mesmo ano, 57.749 M, datos que demostran que o volume de depósitos subiu, sen embargo o crédito descendeu como evidencian os datos de marzo de 2014 con 47.591 M, marzo de 2015 con 44.204 M e en decembro, 43.020 Millóns de euros. A diferenza entre o volume de depósitos e crédito concedido, explicou Jorquera, xa é de 14.729 M, cartos que emigran do noso país para para fornecer crédito noutros territorios.
Consecuencias da venda de Nogagalicia Banco
O nacionalista lemboru que a venda de Novagalicia Banco foi unha venda a perdas cun prezo oficial de 1.003 millóns de euros ao que hai que descontar o custe das coberturas públicas e créditos fiscais dos que se beneficiou o comprador , non se recuperou un só euro dos 8.981 millóns destinados ao seu sanemento senón que se pagou por colocala, recalcou Jorquera.
O FROB engadiu o deputado, recoñeceu que a venda ocasionaba unha perdas para o Estado de máis de 8.000 ME e o Plan de Reestruturación aprobado pola Dirección Xeral da Competencia constara que as garantías a favor do comprador ascenden a 2.322 millóns de euros, unha cantidade moi superior ao prezo oficial da venda.
O parlamentario concluíu a súa intervención reiterando que fica por aclarar o custe real para o erario público da venda anticipadamente de Novagalicia Banco polo que solicitou o apoio dos grupos parlamentarios á iniciativa nacionalista.
