A través dunha pregunta ao goberno, o deputado do BNG, Xosé Luís Rivas (Mini), exixiu medidas contra os abusos da industria nos prezos que deben abonar aos produtores e produtoras de alimentos para que “non resulte máis caro producir que vender” e garantir que as industrias sancionadas por irregularidades nos contratos accedan a subvencións.
O nacionalista explicou que as bases reguladoras das axudas para investimentos en transformación e comercialización de produtos agrarios, cofinanciadas polo Fondo Europeo Agrícola de Desenvolvemento Rural (Feader), convocadas para o 2023 recollían que no seu artigo 3 que “non se concederán nin pagarán axudas aos solicitantes ou beneficiarios que fosen obxecto de sanción firme grave ou moi grave nos dous anos anteriores á data da solicitude ou pago da axuda e no caso de seren obxecto de sanción firme grave ou moi grave en base ao previsto na Lei 12/2013, nos cinco anos posteriores ao pago da subvención”.
Tratábase pois, dixo, o deputado, dunha medida dirixida a evitar os abusos, neste caso, cometidos pola industria cos produtores e produtoras de alimentos. “Unha medida de presión que salvagardase o diñeiro público das mans daquelas industrias que usan esas prácticas”, recalcou.
Sen embargo, a fins do mes de xaneiro, a Consellería do Medio Rural tras coñecer a sanción grave da Axencia de Información e Control Alimentario (AICA), á “empresa amiga do Partido popular” INLEIT, con 9.000 por irregularidades nos contratos cos produtores de leite, decidiu modificar a orde de axudas para suprimir o artigo 3 que penalizaba este proceder.
Para o deputado, a “modificación foi interesada” e confirma a convivencia do Partido popular con determinadas industrias que teñen un “comportamento desleal e lesivo cos produtores lácteos”.
Nesta liña afeou as subvencións recibidas pola empresa INLEIT e acusou a Consellería de Medio Rural de “trato de favor” e reclamou “acabar coas prácticas lesivas” que veñen producíndose na cadea alimentaria e que poñen en risco o futuro das pequenas granxas e empresas agrícolas de transformación de produtos do sector primario.
