A eurodeputada do BNG, Ana Miranda, votou na sesión plenaria do Parlamento Europeo en contra do informe presentado polo eurodeputado do grupo popular Carlos Iturgaiz sobre acuicultura. “Non se pode vulnerar a normativa galega cunha normativa da Unión Europea que vai en detrimento da pesca artesanal e o marisqueo do noso país”, afirmou.
O informe afirma que os procedementos máis complexos para as operacións de acuicultura “son os que atinxen aos requisitos medioambientais” polo que Ana Miranda advirte da posibilidade de abrir a porta á relaxación deses criterios medioambientais que poderían prexudicar as áreas protexidas na Rede Natura, como o caso do Cabo Touriñán.
Para o BNG “resulta imprescindible garantir a protección destes espazos naturais europeos”. A eurodeputada nacionalista lembra que a flexibilización de criterios para a aprobación dunha planta pode ser a porta aberta a instalar macropiscifactorías só por interese especulativo.
Ademais Ana Miranda advirte non só dos riscos medioambientais, senón dos perigos para a pesca artesanal, o cal ao seu xuízo suporía un risco “evidente” para os postos de traballo dependentes da baixura, da acuicultura extensiva e do marisqueo. Neste sentido a eurodeputada lembra o caso de Pescanova, que quería instalarse no Cabo Touriñán co amparo da Xunta.
Non repetir erros
“Non podemos permitírmonos o luxo de repetir os mesmos erros”, subliña Miranda ao respecto, considerando que o desenvolvemento económico non pode entenderse como unha flexibilización de criterios ambientais e a creación de macroinstalacións de acuicultura industrial nas nosas rías.
