O BNG pide manter o centro de saúde de Soutelo de Montes

MONTSEPRADO COMISIONSANIDADE 2
Montse Prado
  • “Estamos en contra de substituír médicos por teleasistencia porque non se pode atender a persoas maiores cunha pantalla”, critica Prado en relación a supresión dun facultativo no centro

A deputada por Pontevedra Montse Prado trasladou ao Parlamento a alarma social xerada entre a veciñanza de Soutelo de Montes ante o previsible peche do centro de saúde e a derivación das persoas doentes ao centro de Forcarei e a confirmada perda dun facultativo. Ademais, o PAC ameazado de peche xa non cubriu máis que con persoal temporal a praza de enfermería e a praza de servizos xerais alegando o pequeno número de cartillas.

 Ante esta situación, o BNG reclamou no Parlamento o mantemento do centro de saúde de Soutelo do que destacou que “unha parte moi significativa das persoas usuarias ten idade avanzada, -40% con máis de 65 anos-, moita sen vehículo propio e sen transporte público para desprazarse a Forcarei”, así como a dotación de persoal suficiente empezando por dar marcha atrás na supresión dun facultativo.

Ademais, explicou Prado na Comisión de Sanidade, o centro de Soutelo de Montes “ten un volume importante de persoas doentes crónicas o que implica un volume de traballo elevado” para quedar cun só facultativo, como paso previo ao peche.

A resposta do Goberno xustificando co servizo de teleasistencia a supresión do segundo médico foi duramente contestada pola deputada nacionalista.

“Estamos totalmente en contra de substituír médicos por telefonillos e pantallas no rural galego cunha poboación tan envellecida, como complemente si, pero pensar que ás persoas maiores se lles pode dar un servizo asistencial de calidade por teléfono é unha falsidade”, recriminou Prado, quen cualificou de “indecente” que a Xunta utilice un criterio “contable” do número de cartillas por facultativo para xustificar o recorte, “cando se trata de doentes que precisan unha atención médica moi intensa”.

“Os veciños e veciñas de Soutelo de Montes teñen dereito a ter unha asistencia de calidade e que cando cheguen ao centro non se atopen con que médico está ausente de consulta nun domicilio ou nunha urxencia”, reiterou, “e teñen dereito a non ter que destinar a súas pequenas pensións para pagar o taxi que os leve a Forcarei desde Soutelo podendo ter centro de saúde na súa localidade”.

Prado chamou a atención sobre o feito de que o peche deste servizo tería un impacto na saúde da poboación pero tamén un impacto económico, “pois suporía un prexuízo para a economía local afectado actividades como do comercio, taxis, botica ou alimentación, que soportarían unha caída da súa clientela mesmo con posibilidade de ter que pechar”, explica Prado.

Afíliate, faite do bloque
Anímate a dar o paso, súmate ao proxecto do BNG