Imprimir

O BNG leva ao Congreso a actuación irresponsábel da alcaldesa de Vilariño de Conso

BNG - Bloque Nacionalista Galego | 02 de maio de 2020

Néstor Rego
Néstor Rego

O deputado Néstor Rego pregunta ao Ministerio de Interior sobre que medidas vai adoptar sobre a actuación da rexedora que incumpre claramente o estado de alarma.

O BNG vén de presentar no Congreso unha pregunta escrita dirixida ao Ministerio de Interior para que explique se tiña constancia de que o pasado sábado, 25 de abril, a alcaldesa do concello de Vilariño de Conso, desprazouse nun coche de protección civil dese mesmo concello, até o veciño concello de Viana do Bolo, xunto con outras tres persoas, para repartir obsequios polos fogares vianeses. Varias desas persoas, ían disfrazadas e entregaban lambetadas aos nenos e nenas, coa sirena e música soando cun volume elevado.

Os nacionalistas denuncian que con esta actuación a alcaldesa de Vilariño de Conso, e tamén os seus acompañantes, incumpriron de forma clara e fragrante o estado de alarma e, ademais, cunha actuación claramente irresponsábel que pon en risco a seguridade dos cidadáns e cidadás, pois no seu afán de achegamento, non se respectaron as normas de distancia física, polo que se puxo en risco a saúde pública da veciñanza de Viana do Bolo.

Por se fora pouco, todo isto realízao fóra do territorio sobre o que ten competencias, tal e como se estabelece na Lei 7/1985, de 2 de abril, Reguladora das Bases do Réxime Local, é dicir, abandona o termo municipal no que exerce de rexedora para desprazarse de forma totalmente consciente e deliberada a un municipio veciño, o de Viana do Bolo.

Tal e como informou o alcalde do BNG, Secundino Fernández, esta actuación comandada pola alcaldesa de Vilariño de Conso foi sen previo aviso, sen comunicar ao concello de Viana do Bolo nin as autoridades competentes.

 

Podes ver este artigo na próxima dirección /articulo/novas/bng-leva-ao-congreso-actuacion-irresponsabel-da-alcaldesa-vilarino-conso/20200502141503026972.html


© 2020 BNG - Bloque Nacionalista Galego

Bloque Nacionalista Galego
Avda. Rodríguez de Viguri, 16 baixo
15703 Santiago de Compostela
GALIZA
CIF: G32014003
Correo: [email protected]
Teléfono: 981555850

facebook twitter youtube whatsapp telegram instagram flickr