Imprimir

O BNG insta á Xunta a buscar unha solución á praga da velutina

BNG - Bloque Nacionalista Galego | 07 de agosto de 2019

Vespa velutina comendo un figo
Vespa velutina comendo un figo
Xosé luís Rivas denuncia “inacción” do goberno ante as consecuencias da praga e demanda medidas urxentes para freala

O deputado do BNG, Xosé Luís Rivas denuncia no  Parlamento, a través dunha pregunta oral en pleno,  a “inacción do goberno” ante a praga de velutina. Rivas demanda medidas urxentes e investigar sobre o comportamento da avespa que está a ameazar gravemente a saúde pública e o equilibrio medioambiental.

O parlamentario do BNG lembra que o pasado ano foron retirados  24.000 niños de velutinas, a metade  na provincia da Coruña, e recalca que a avespa está a causar importantes perdas na apicultura, na fruticultura e na polinización.

O cambio no comportamento da especie do ano 2017 a respecto do 2018 foi radical. Mentres no 2017 dunha climatoloxía sen chuvias e con temperaturas inusualmente benignas no inverno favorecía a ubicación da especie en grandes niños preto dos cursos de auga e alonxados das casas, no 2018 cun clima máis adverso buscaron abeiro preto das casas e fabricaron niños pequenos menos visibles. Isto traduciuse nun maior número de accidentes cun gran número de  picaduras e a morte de persoas con alerxia ao seu veleno.

O deputado do BNG insta ás consellerías de Medio Rural e Medio Ambiente a incidir na información para que a poboación saiba como reaccionar ante os ataques da velutina. Por outra parte, denuncia que ambas consellerías manteñen unha “actitude escurantista” e continúan desviando a responsabilidade ás deputacións e concellos obrigados a investir catro veces máis que a propia Xunta na loita contra a praga

“É obriga de Medio Rural e Medio Ambiente establecer, orzamentar e coordinar liñas de investigación acordes á magnitude do problema e dar información clara e útil á poboación que evite accidentes e danos  na mesma e máis no medio natural”, remarca Rivas. As declaracións da Conselleira afirmando que o problema da velutina non tiña solución e  debiamos resignarnos a convivir con ela é “inaceptable mírese desde onde se mire”, conclúe o deputado.

Podes ver este artigo na próxima dirección /articulo/novas/bng-insta-xunta-buscar-solucion-praga-da-velutina/20190807221309025248.html


© 2019 BNG - Bloque Nacionalista Galego

Bloque Nacionalista Galego
Avda. Rodríguez de Viguri, 16 baixo
15703 Santiago de Compostela
GALIZA
Correo: [email protected]
Teléfono: 981555850

facebook twitter youtube whatsapp telegram instagram flickr